"Ëiles & Stëiles" n l di dl’ëiles ai 8 de merz
Manifestazion "Ëiles & Stëiles - Cultura al feminin tla Ladinia" n l di dl’ëila ai 8 de merz tl Tublà da Nives te Sëlva
BULSAN/SËLVA (USP). N ucajion dl di nternaziunel dedicà al’ëiles ai 8 de merz ti dà l Tublà da Nives chëst ann na lerch speziela ala cultura fata da ëiles ladines ti ciamps plu defrënc. L prugram dla sëira stluj ite mujiga, leteratura y ert, cun la partezipazion dl cuartet vocal Tel Tipes, la poetëssa Cristina De Grandi, l’artistes Helene Demetz y Anna Anvidalfarei y la poetëssa slam Irene Moroder. La redazion dla revista Gana fajerà te chësta ucajion na previjion sun la proscima edizion de Gana, che unirà ora chëst’ansciuda.
Te na mëisa turonda uniral jit ite sun la figura dl’ëila tla sozietà d’al didancuei. L rujenerà ëiles che ie da cësa te ciamps soziei defrënc: Hannelore Insam, cumëmbra dla Consulta per la valivanza dl’oportuniteies, Irene Prinoth, diretëura dl Istitut culturel ladin Micurà de Rü, Jasmin Ferdigg, jurnalista, y Lotte Nogler, ex atleta y mpresera. Ëiles, che purterà dant si esperienzes y reflescions n cont dla perzezion dl’ëila tla sozietà. La moderazion ie de Martina Rier.
La manifestazion "Ëiles & Stëiles - Cultura al feminin tla Ladinia" scumëncia
n dumënia ai 8 de merz,
dala 6 da sëira
tl Tublà da Nives
tla streda Nives 6
te Sëlva.
Ala fin dl prugram jirà la manifestazion inant cun mumënc d’aurela curta n cumpania dla DJane Elena Pitscheider, che viv a Berlin.
“Ëiles & Stëiles” ie na scumenciadiva dla Lia culturela Tublà da Nives n culaurazion cun l Departimënt Intendënza y Cultura Ladina dla Pruvinzia de Bulsan.
La sëira ie davierta a dutes y a duc. La ntreda ie liedia. L vën prià bel de resservé la lerch mandan na e-mail a info@tubladanives.it o mandan n messaje WhatsApp al numer +39 333 7166471.
red/mac
