Opres de streda: dat pro l prugram di nvestimënc 2026-2028
415 milions de euro nvestii per i trëi ani te nfrastrutures strategiches per la stredes. Alfreider: “Segurëza y resiliënza dla stredes per na miëura cualità dla vita dla jënt.”
BULSAN (USP). Ntan la senteda de n vënderdi ai 13 de fauré à sun pruposta dl assessëur provinziel per la Nfrastrutures Daniel Alfreider la Jonta provinziela dat pro l documënt de plu ani de prugramazion dla opres per la stredes 2026-2028 dla Repartizion Nfrastrutures. Ti proscimi trëi ani iel preudù dut adum 415 milions de euro te nvestimënc tla nfrastrutures strategiches per la stredes sun dut l raion provinziel.
L assessëur provinziel per la Nfrastrutures Daniel Alfreider à sotrissà la finamira: “Ulon nvestì metan a verda avisa ala segurëza dla nfrastrutures dla stredes y a si resiliënza, per strënjer ite uni manaceda per chiche ie sun streda. A una cun dut chësc ulons nce ti dé na udleda particulera ala nfrastrutures dla ferata, per ti dé na auternativa reéla al auto y alesiré l trafich ti zëntri abitei, cun benefizies ndrëc n con’ dla cualità dla vita.”
La ressurses nvestides
La ressurses ie mpartides ite nscila per i trëi ani: 231 milions de euro per l 2026, de chisc 101 milions che vën dal bilanz provinziel, 44 dal Fond de Svilup y Coejion (FSC) y 85 milioni de euro dai fonds olimpics; 115 milions de euro per l 2027, de chisc 90 milions che vën dal bilanz provinziel y 25 da fonds olimpics; 70 milions di euro per il 2028, che vën defin dal bilanz provinziel. “On bele pudù purté a bon fin set pruiec mpurtanc fajan unì adalerch nvestimënc da dedora dala provinzia, de gra ai Juesc Olimpics da d’Inviern y ala cunlaurazion cun l’autra istituzions regioneles, stateles y comunitaries. Son stolc che sonse stac boni de se fé dé fonds sibe da Roma che da Bruxelles per ti sauté ite a pruiec che fova bele sun l papier da vint o trënt’ani incà,” à sotrissà l assessëur Alfreider.
De ndut 15 apalc te mpue’ passa un n ann
Dai pruiec nchin ai cantieres: danter l 2026 y i prims mënsc dl 2027 iel preudù 15 apalc tachei ite al FSC (1), ai Juesc Olimpics (2) y ala segurëza idrogeologica (12). Pra chisc ultimi iel da auzé ora particularmënter n tunel sun la SP24 per Fie.
D’autri apalc mpurtanc ie per tò y tres l passaje pra la ferata a Sanciana y per seguré dut ntëur la strada statela SS49 de Puster danter Kiens y San Laurënz. Pona iel n uedl particuler nce per la Venuesta, dantaldut per seguré dut ntëur la trassa dla SS40 tl Chemun de Graun.
L plann coche l ie unì repurtà ntan la cunferënza stampa à da n fé cun i trëi ani che à da unì, “ma la vijion va sëura i trëi ani ora, ajache i fonds vën nuzei per apalté i lëures ma nce per i njenië ca per i ani da dedò,” à dit l diretëur dla Repartizion Nfrastrutures Umberto Simone, dajan da lecurdé che la Provinzia autonóma de Bulsan ie danter i cumitënc talians prinzipei, do RFI y ANAS, fajan nscila a na maniera de fé unì adalerch nvestimënc mpurtanc sun l raion.
gm/red
