L vën cris destudafuech prufesciunei nueves, sibe ëi che ëiles
L curs per destudafuech a livel prufesciunel scumëncia: partezipantes y partezipanc vën crisc ora tres n cuncors furmatif – La dumanda possa unì data ite nchin ai 6 de merz
BULSAN (USP). I Destudafuech de Prufescion chier 33 uemes y andes nueves: la stieres per la sënta de Bulsan vën dates ora tres n cuncors furmatif, l terminn da dé ju la dumandes ie nchin ai 6 de merz.
La partezipantes y i partezipanc dl cuncors muessa n iede fé na preselezion, tlo iel nce da fé n ejam pratich y n ejam sportif. Do la preselezion uniràl lascià pro 33 aspirantes y aspiranc a fé pea l curs furmatif pratich-teorich, ulache i giapa la furmazion per l cheder prufesciunel de Destudafuech, ël o ëila.
Presuposc
Per pudëi fé pea pra l cuncors furmatif pòssel fé dumanda persones de majera età cun l ejam da scola mesana y l atestat da fant, che ne à nia passa 30 ani, chël uel dì che i/les ne daussa nia vester nasciui/nasciudes dan i 6 de merz dl 1996 y nia do i 6 de merz dl 2008.
Oradechël vàl debujën dla patent dal auto B y dl ejam de bilinguism B1 aldò dl cheder de referënza europeich (zacan l C), per i ladins l atestat aldò de trilinguism. Chiche fej dumanda muessa avëi la zitadinanza taliana y desmustré de vester fisicamënter adatà/eda.
Chiche ne à degun ejam de furmazion do la scola mesana possa mpo fé pea pra l cuncors, ma mé sce l à un de chisc presuposc: avëi almanco trëi ani de esperienza de lëur te un di lëures nunziei, trëi ani de esperienza de lëur coche nudadëur de salvataje, trainadëur/a fitness dl livel II o coche sciafer/a pra na lia de destudafuech ulenteres cun la patent CE.
Per pudëi fé pea l cuncors iel da fé dumanda nchin ai 6 de merz
Per fé pea pra l cuncors iel da fé dumanda nchin ai 6 de merz dala 12.00, online sun la plata internet dl Ufize provinziel per tò su personal, tl ciamp “cuncorsc”, ulache n possa nce se tò ju la documentazion y i formuleres.
Aldò dla preselezion vëniel pona fat na graduatoria. I miëur y la miëura 8 dancà tla graduatoria vën lascei/edes pro pra l curs furmatif teorich-pratich che dura almanco sies mënsc; nchin a 25 candidates y candidac possa fé pea l curs.
Nfurmazions sëuraprò iel da abiné sun l portal internet dl’aministrazion sot a cuncorsc (“Wettbewerbe”): personal.provinz.bz.it o tl Ufize provinziel per tò su personal: per telefonn 0471 411563 o via mail a William.Pedrazza@provinz.bz.it.
Nfurmazions n con’ di Destudafuech de Prufescion iel da abiné sun la plata internet bevoelkerungsschutz.provinz.bz.it/de/berufsfeuerwehr o tres telefonn cherdan su l numer 0471 415988.
mac/dl
