Scumenciamënt per l plann raiunel dla Mont de Sëuc
La finamira ie la scunanza y l svilup dla spersa naturela Mont de Sëuc – Tuchei ie ades 6.800 etares ti chemuns de Ciastel, Santa Cristina y Sëlva
BULSAN (USP). Tla sënta dla Repartizion Natura, Cuntreda y Svilup dl Raion iel nstadì unì dat l start ufiziel per lauré ora l plann raiunel sëuracumenel nuef per la Mont de Sëuc. Reprejentanc di Chemums de Ciastel, Santa Cristina y Sëlva deberieda cun n team interdiszipliner de esperc à fat pea pra l Kickoff-Meeting ai 27 de jené a Bulsan. Per ntant iel unì prejentà la struturazion dl pruiet, n prim plann de tëmpes da tenì ite y i ponc de relevanza tematica.
L plann nuef che ie da lauré ora renuverà defin l Plann de Cuntreda di ani setanta. L raion tucà dala planificazion tol ite pertes di Chemuns de Ciastel, Santa Cristina y Sëlva cun de ndut 6.800 ha. L plann de cuntreda nuef tulerà ite cater ciamps tematics zentrei: raions naturei y ecologia, cuntreda da paur y di bòsc y cuntreda raiunela-culturela tradiziunela, ativiteies turistiches economiches y de tëmp liede y pona nce la mubltà tl raion alpin.
La finalità ie chëla de garantì n svilup sustenibl tl raion naturel y culturel sensibl dla Mont de Sëuc. Nscila dëssel unì atualisà dut ntëur i cuntenuc, la grafiches, la normes de scunanza y la regules de anuzamënt. “L scumenciamënt dl pruiet dl plann de cuntreda dla Mont de Sëuc ie na merca mpurtanta per n var de viers dla scunanza y dl svilup de chësc raion scialdi bel de vita y da cuntreda,” da coche auza ora l assessëur provinziel per la Scunanza dl Ambient, dla Natura y dl Tlima y dl Svilup dl Raion Peter Brunner.
Pruzes lerch de partezipazion
L plann raiunel dëssa unì laurà ora trajan ite truepa jënt: te workshops, te ancuntedes de feedback y manifestazions publiches dëssel unì trat ite la populazion, la mprejes, l turism, i paures, atëures de scunanza dla natura y d’autra grupes de nteres. La cunlaurazion strënta danter Chemuns, esperc y grupes de nteres dëssa seguré che l vënie tenì cont sun mesura y te na maniera balanzeda ora dla natura, dl anuzamënt y dla cualità de vita,” sotrissea l assessëur Brunner.
Ti proscimi mënsc uniràl fat analises plu sotes y metù adum chertografies de habitat, pona uniràl laurà ora la prima prupostes de planificazion,” da coche spiega la diretëura dl Ufize provinziel per la Planificazion di Chemuns y dla Cuntreda Carlotta Polo. "Oradechël uniràl metù su na grupa de cuordinamënt metuda adum da Chemuns, Provinzia y esperc tl ciamp dla planificazion dla cuntreda, dl’architetura, dl’ecologia y de partezipazion.”
L Kick-off-Meeting cun i Stakeholders sarà ai 3 de merz te Chemun de Ciastel. Tl 2027 dëssa la prima pruposta dl plann raiunel nuef vester danman.
mpi/red
