Alfreider a Roma: l’arpejon olimpica che resta te Südtirol
L assessëur prejënt pra l evënt urganisà dal MIT: “Cun la Olimpiades devëntel realtà pruiec che fova unii damandei bele dan 20 ani, cun benefizies cuncrec y che dura tl tëmp per i zitadins.”
ROMA (USP). I Juesc Olimpics da d’Inviern Milan-Cortina 2026 vën for plu y plu daujin. N mierculdi ai 21 de jené ie l vizepresidënt dla Jonta provinziela de Bulsan Daniel Alfreider stat ghest pra l evënt mostra “Dal suenn ala realtà. La Talia tl zënter dl mond”, tla dizion uriginela taliana “Dal sogno alla realtà. L’Italia al centro del mondo”, urganisà a Roma dal Ministere dla Nfrastrutures y di Trasporc.”
L panel pra chël che l à fat pea Alfreider fova dedicà ala nfrastrutures di Juesc che resta tl tëmp, per i raions tuchei. Te si ntervënt à l vizepresidënt sotrissà che l’ucajion olimpica muessa nce avëi resultac cuncrec per la cumenanza, cun ntervënc de utl per la vita da uni di y che posse fé unì su valor y valuta te n tëmp plu lonch. “L ne n’ie nia i no che fej su l daunì. De gra a chësta ucajion ie pruiec che univa bele dan 20 ani damandei dala zitadinanza deventei realtà, cun resultac che resterà per i zitadins nce do la Olimpiades,” à dit Alfreider, auzan ora che i ntervënc muessa resté benefizies stabii, che resta per la cumenanza: “Ne lauron nia per n evënt, ma per na miëura mubltà y per plu cualità de vita.”
L majer focus iel pra la ferata,” ajache l ie n nvestimënt che fej unì su valor per dejeneies de ani: plu jënt che possa unì traspurteda, de miëur cunliamënc ma nce orares y servijes sun chëi che n possa se lascé deplù,” à spiegà Alfreider, dajan da lecurdé che dlongia l trasport sun ferata iel nce ntervënc mirei per n valgun cunliamënc de stredes, dantaldut ulache l va debujën de segurëza y l mesun de ruvé permez.
Pra la manifestazion àl nce fat pea la ministra per l Turismo Daniela Santanchè, l’aministradëur delegà dla Grupa FS Stefano Antonio Donnarumma y i presidënc Maurizio Fugatti dla Provinzia autonóma de Trënt, Alberto Stefani dla Region Venet y Attilio Fontana dla Region Lombardia. L’autoriteies à sotrissà la cunlaurazion danter istituzions y subiec tecnics, prejentan n valguni di lëures y di ntervënc destinei a lascé na arpejon nce canche la Olimpiades sarà stlutes ju. Tl cunfront danter i partezipanc iel unit ora che, pra pruiec de n tel pëis, ne sibe l lëur de scuadra nia mé n slogan ma na cundizion che va debujën. “Evënc de n tel livel se damanda na drëta cunlaurazion y de bona sinergies danter truep partners: Ministere, Ferates, Ufizies dla Provinzia y SIMICO. L ne suzed nia suvënz che n possa purté inant pruiec deberieda danter i truep atëures, te na maniera tan cuordineda, y l ie nce na gran legrëza a udëi chësta cuoperazion n azion,” à njuntà Alfreider, sotrissan che l muessa unì valorisà la capazità de lauré deberieda.
red
