Cuntribuc per l’energia: la Jonta provinziela dà pro i criteres 2026
La Jonta provinziela va inant cun si mpëni tl ciamp dla funtanes renuvables de energia y dl sustëni per la efiziënza energetica – Dai 1. de jené inant mé plu dumandes online
BULSAN (USP) – La Jonta provinziela de Bulsan se à ai 19 de dezëmber dat ju cun i criteres y la diretives n con’ dl sustëni per la efiziënza energetica y dl anuzamënt dla funtanes renuvables de energia, i dajan pro per l ann 2026.
I criteres per giapé cuntribuc finanziei vel sibe per persones natureles, aministrazions publiches y ënc zënza finalità de davani coche nce per mprejes.
"Tl 2025 ons miurà i criteres tl ciamp dla funtanes renuvables de energia, per smendré mo deplù la dependënza da purtadëures de energia fossila y per arbassé i custimënc dl’energia per la populazion y per la mprejes te na maniera sustenibla. Tl ann 2026 jons inant cun chësc engagement per mantenì, almano tan che, la mesures y la perzentueles de sustëni che ie unides sustenides tl ann 2025,” stlarësc n chësc cont l assessëur per la scunanza dl ambient, dla cuntreda y dl tlima, per l svilup y per l’energia Peter Brunner.
Cuntribuc per mplanc fotovoltaics, per pateries da tenì su y per pumpes per l ciaut
Per „pumpes per l ciaut eletriches cun mplanc fotovoltaics“ vëniel inant dat n cuntribut de 60% dl custimënt lascià pro. Te condominium ie la perzentuela monce dl 80%. “La ufenjiva dla pumpes per l ciaut à na gran ressunanza. Propi perchël mantenions l bon niveau de sustëni: la finamira ie chëla de fé che l plu jënt che l ie mesun posse scumencé a sciaudé te na maniera segura per l daunì y bona per l tlima,” sotrissea l assessëur provinziel Brunner.
Nueva ie la calculazion dl custimënt lascià pro prermëter ju pumpes eletroniches de sciaudamënt. Oradechël pòssel pra n barat de mplanc de sciaudamënt autonoms cun pumpes de sciaudamënt te uniteies edilizies - n auternativa ala Zertificazion-CësaTlima – nce unì mustrà l Atestat de Prestazion Energetica APE.
Per la pitla mprejes vën la perzentuela per mëter su mplanc fotovoltaics auzeda da 20 percënt dl custimënt lascià pro a 25 percënt, sce i prudoc finei y i tòc plu mpurtanc dl mplant ne vën nia dala Cina.
Nuef ie nce che i cuntribuc per i mplanc fotovoltaics posse unì cumulei da chiche fej dumanda cun la tarifes de sburdla per cumenanzes energetiches.
Per persones singules, per aministrazions publiches, ënc zënza finalità de davani coche nce per pitla mprejes vëniel inò dat cuntribuc per pateries da tenì su per mplanc fotovoltaics. “L travert de chësta mesura ie de auzé l anuzamënt per sé nstësc dl’energia renuvabla che ie unida fata y ti tò nscila pëis ala rëies dala lectrisc,” da coche spiega Petra Seppi, la diretëura dl Ufize provinziel per Energia y Scunanza dl Tlima.
L fova bele nchin a ncueicundì nscila che a mëter su mplanc de surëdl termics, pumpes de sciaudamënt eletriches y a baraté ora mplanc de sciaudamënt a uele y gas te frabicac de puscion deberieda che ie dedite da n raion ulache n possa giapé energia da mplanc y strutures de sciaudamënt da dalonc ne giapòvun nia cuntribuc. Dai 1. de jené inant uniràl ora n regulamënt per na ezezion: chësta vel per duc i caji ulache la ne va nia, sibe dal pont de ududa tecnich che economich, a se taché ite a n mplant de sciaudamënt da dalonc. Te n tel cajo muessa chiche manejea l mplant de sciaudamënt da dalonc dé ju n atestat.
Pervia che l ie nchinamò stat puecia dumandes ne vëniel nia plu dat cuntribuc per la mesura “Balanzamënt idraulich de mplanc de sciaudamënt y de desferdamënt.”
Dai 1. de jené inant ie la dumandes de cuntribut da mandé ite online
La dumandes de cuntribut possa unì dates ite dai 1. de jené nchin ai 31 de mei dl 2026 pra l Ufize provinziel per Energia y Scunanza dl Tlima. Nuef iel che la zitadines y i ziadins, la mprejes y i ënc publics possa dé ite la dumandes de cuntribut estlujivamënter tres l online-Portal myCIVIS tres SPID, CIE o cherta dla zitadina ativeda.
La dumandes muessa unì dates ite dan l scumenciamënt di lëures. Nchin ala fin dl ann vën duta la nfurmazions y l servisc revardënt per la cuntribuzion dl’energia 2026 renuvedes sun la plates internet dla Provinzia.
mpi
