"50 ani a crië puenc danter rujenedes, cultures y persones"
Festa per i 50 ani – l diretëur dla Ntendënza y dla Cultura André Comploi: "La Ntendënza ladina ie da mez secul garanta per chësc sistem scolastich ladin speziel"
BULSAN (USP). Cun referac de mpuls y cunversazions, cun cianties ladines y bai, cun poetry slam y comunicac video àn, ai 14 de nuvëmber, cialà de reviers sun mez secul de storia, da canche l ie unì metù su la Ntendënza ladina, y nce l presënt y l daunì ie unic tematisei.
“Ti dejeneies passei iel cherscù la cuscienza dla mpurtanza y dl valor dla rujeneda dl’oma per la furmazion dl’identità dla populazion tla valedes ladines”, à detlarà l Presidënt dla Provinzia Arno Kompatscher. N’aministrazion scolastica aposta per la populazion ladina tl Südtirol dal 1975 ie na cuncuista dl Segondo Statut de Autonomia. Dadedò se à l sistem de scola paritetich svilupà bën y à sën na si bona pusizion, dantaldut per cie che reverda l plurilinguism, che vën nce recunesciù y sciazà oradecà. “Cialé de reviers a mez n secul ie perchël na ucajion de sodesfazion ma nce na ucajion per cialé inant per pudëi afrunté cun suzes la ndesfidedes de n sistem de istruzion a bën de nosc mutons/nosta mutans.” à dit l Presidënt dla Provinzia.
“50 ani de Ntendënza ladina uel dì 50 ani de criazion de puenc danter la rujenedes, cultures y persones – cun na intlusion vivuda y na culaburazion strënta cun la Ntendënzes tudëscia y taliana. Nsci possa la rujeneda y la cultura ladina crëscer y se svilupé inant – n ejëmpl viv per na istruzion cun cuer y vijions a tëmp lonch“, à spligà l Assessëur per la Istruzion y cultura ladina Daniel Alfreider.
"La Ntendënza ladina ie da cincant’ani na garanzia per l sistem de scola ladina particuler", à sotrissà l diretëur dla Ntendënza y Cultura ladina André Comploi: "Tl medemo mumënt cëla la Ntendënza ladina che chësc sistem se svilupeie for inant tenian var cun la ndesfidedes di tëmps – for tl cheder dl model paritetich che ne reprejentea nia mé n cunzet didatich y culturel, ma nce n strumënt de sëuravivënza per chëla che ie storicamënter la mëndra grupa linguistica dl Südtirol. Chësta cuncuista de nosta autonomia merita de unì festejeda: la ie na ucajion per cialé de reviers cun recunescënza a cie che ie unì arjont y tl medemo tëmp na ucajion per cialé inant y furmé l daunì a na maniera cuscienta."
"La Ntendënza ladina, che ova dl prim bel scëmpl la funzion de aministré la istituzions scolastiches ladines, se à tl tëmp de doi generazions svilupà te na istituzion defrenzieda y articuleda che sustën nosta scolines y scoles dal pont de ududa didatich y pedagogich", sotrissea l Ntendënt ladin Heinrich Videsott: "La criatività dl "Ciamp Pedagogich" tla produzion de materiai de nseniamënt y tla urganisazion de ufiertes d’ajurnamënt, la sensibltà dl "Servisc per l'intlusion" tl tratamënt de sculeies y sculées cun bujëns particuleres y la pruzedures te nosc ispetorac urientedes de viers de soluzions for cunliedes a na gran prufesciunalità, garantësc che nosta scola ladina se svilupeie inant cun suzes."
red
