Situaziuns de crisa te scolina y scora: Protocol d'intervënt
Presentada a Porsenú la publicaziun dada fora dala Direziun provinziala Scolines y scores ladines adöm cun la doturia Donatella Arcangeli
PORSENU (USP). N grup de laur dla Intendënza Ladina coordiné dal Sorvisc por l’inclujiun, á lauré fora, adöm cun la Primara dl Sorvisc provinzial de psichiatria y psicoterapia dl’eté evolutiva dl’Aziënda sanitara dl Südtirol Donatella Arcangeli, le “Protocol d'intervënt te situaziuns de crisa por la gestiun de problems de comportamënt gravënc te scolina y scora”. Al se trata de n documënt svilupé por ti dé tles mans al personal dles scolines y dles scores de döta la Provinzia metodologies y stromënc concrec por afronté, te na maniera sistematica y asvelta, les dificoltés de comportamënt dles scolares y di scolars. Le protocol pita strategies educatives y operatives por le personal educatif, sciöche la gestiun dles crises de comportamënt, la comunicaziun cun les families y la colaboraziun cun i sorvisc dl teritore.
"Le protocol á sciöche fin da relevé adora assá comportamënc problematics dles scolares y di scolars y da ativé intervënc adatá por prevení che situaziuns de crisa devëntes gravëntes", á dit la doturia Donatella Arcangeli tratan so referat. En vëndres, ai 7 de november, é la publicaziun gnüda presentada a Porsenú tla Facolté de Sciënzes dla Formaziun dla Université Lëdia de Balsan. La referënta por l’inclujiun dles scores dles localités ladines Elena Pellegrini á sotrissé che “al se trata de n stromënt d’ütl por les insegnantes y i insegnanc da afronté situaziuns de comportamënt ries cun na metoda tlera.”
L’Intendent scolastich Heinrich Videsott á dit che "chësc documënt é n vare important por daidé garantí a mitans y mituns, insegnantes y insegnanc y a düc chi che laora te scora, n clima de serenité y de inclujiun, olache ince les situaziuns plü ries pó gní afrontades cun profescionalité y sensibilité.”
Le documënt é da ciafé te düc i trëi lingac dla Provinzia sot al link: ladinische-bildung.provinz.bz.it/de/publikationen, scuola-ladina.provincia.bz.it/it/pubblicazioni, scora-ladina.provinzia.bz.it/lld/publicaziuns
red
