Prejentazion dl liber “Werni per n miëur mond”
L liber ilustrà uel sensibilisé i mëndri n cont dla scunanza dl ambient y dl refudam, dla sustenibltà y dl mpaziamënt dl’eghes - L ie dat ora dal Ciamp pedagogich
BULSAN/URTIJEI (USP). Cun de blòt dessënies vëniel cuntà la storia dl ierm Werni che vëija l mpaziamënt dla natura sun si viac de viers dl Pol dl Nord y che se tol dant deberieda a si cumpanies de fé velch per l planët Tiera.
Do che l Ciamp pedagogich ova prejentà d’autonn dl 2019 l liber ilustrà “Werni y la storia dla tiera“, fovel unì scrit ora - sun scumenciadiva de Ute Senoner - n cuncors per sculeies y sculées dla scoles mesanes y di prim doi ani dla scoles autes per crì na storia sun la tematica “Refudam - n problem, truepa alternatives”. Venciù l cuncors ova la storia dla mutans y di mutons dla segonda tlas dla scola mesana de Urtijëi cun si nsenianta Margot Moroder. Sën sons cuntënc de avëi dan man l liber ilustrà y che pudon l prejenté ai 13 de nuvëmber dala 16:00 tla scolina “Salieta” de Urtijëi.
L ie unì stampà na verscion cun i doi idioms ladins de Gherdëina y dla Val Badia y n’autra verscion per tudësch y talian acioche i mëndri posse se lascé liejer dant la storia tla rujeneda dl’oma, ma nce per pudëi mparé leprò paroles nueves te d’autra rujenedes. Chëst ann de scola giaperà pona uni muta y uni mut dla scolines ladines un n tel liber do che la tematica dla scunanza dl ambient ie unida trateda tla scolines. Nce per la tlasses nteressedes dla scoles primeres iel mesun se apusté n tel liber scrijan al Ciamp pedagogich dla Direzion provinziela Scolines y scoles ladines: pedagogich@provinz.bz.it o Link.
red
