René Pescoll, diretëur nuef dla Direzion dla Scolines "Ladinia"
Cun i 13 de utober sëurantol René Pescoll la Direzion dla Scolines "Ladinia", na stiera che fova bele da n struf incà ueta
BULSAN (USP). Cun i 13 de utober sëurantol René Pescoll la Direzion dla Scolines "Ladinia", na stiera che fova bele da n struf incà ueta. Pra l cuncors per arjonjer la cualificazion coche "direzion de segondo livel, sezion istruzion" dl plan uniter dla stieres de direzion dla Provinzia iel stat bon de cunvëncer la cumiscion de ejam, sibe tl ejam a usc, pra la valutazion di tituli, che nce tl assessment-center. Nce tla pruzedura de selezion iel unì cunstatà che si profil y si curriculum desmostra che l ie adatà per la posizion spezifica.
"Ie me ncunforte che n à pudù sëurandé la stiera per la direzion dla scolines ladines y ti feje i cumplimënc a René Pescoll per avëi venciù l cuncors y la pruzedura de selezion. L cunësc drët bën l sistem formatif ladin, y ie son segur che l arà suzes te si ncëria. Ti mbince truepa legrëza y energia", spiega l Assessëur Provinziel per l’Istruzion y la Cultura ladina Daniel Alfreider.
"La furmazion y l percurs prufesciunel de René Pescoll rejona per sé. Pra l colloquium tla pruzedura de selezion al desmustrà mutivazion, na cuscienza tlera per la ucajions y ndesfidedes atueles tla scolines, ideies cuncretes y na vijion inclusiva y cooperativa, che spidlea i valores dl sistem educatif ladin", auza ora l diretëur dl’Intendënza y Cultura ladina André Comploi.
"Tl ultimo ann y mez à la ispetëura per la scolines Genny Ploner sëurantëut sëuraprò la direzion dla scolines 'Ladinia'. Cun la numinazion de René Pescoll coche diretëur dla scolines possen inò despartì la doi posizions de direzion, y chësc arà dessegur na fazion positiva sun l lëur tla scolines ladines. Ie ti mbince a René Pescoll truepa legrëza te si funzion nueva y rengrazie Genny Ploner per si bon lëur", nsci l Diretëur Provinziel dla Scoles y Scolines ladines Heinz Videsott.
René Pescoll à studià scienzes dla furmazion primera y à fat de plu spezialisazions de didatica, psicopedagogia, pedagogia Montessori y nseniamënt de nglëisc. Sëuraprò al mo stlut ju n master de desturps de cumpurtamënt y intervenzion tl cuntest de scola. Te si cariera prufesciunela possel mustré su esperienza de nseniamënt te scola y tl’università, ativiteies da tutor y de acumpaniamënt, cunlaurazion te cumiscions de ejam, mpëni te teams de crisa, publicazions scientifiches y ativiteies pra cunferënzes. Tl ultimo tëmp fovel coordinadëur de praticantes y praticanc tl‘Università Liedia de Bulsan.
reed
