Mic y lijëndes ladines: preparazion ala candidatura UNESCO
L dossier per la preparazion ala candidatura UNESCO dl ritual dla trasmiscion di mic y dla lijëndes coche patrimone culturel imateriel ti unirà mandà al ministere talian dla cultura
S. MARTIN DE TOR (LPA). Tl cheder dl Di dla cultura ladina ai 21 de setëmber (LPA à comunicà) iel unì a s’l dé n simposium scientifich nteressant cun l titul Mic y lijëndes ladines tla gran sala dl Istitut Ladin Micurá de Rü. I referac dla prufessëura Ulrike Kindl (L’enigma dla memoria), dl prufessëur Pier Luigi Petrillo (L ritual de cunté i mic ladins y i patrimonesc culturei dl’umanità) y de Giovanni Mischí (Co vála pa inant) ti à drët plajù al publich che à desmustrà n gran nteres. Ala fin de si referat ti à l prufessëur Petrillo sëurandat al Assessëur Provinziel per l’Istruzion y la Cultura ladina Daniel Alfreider l dossier per la preparazion dla candidatura per l recunescimënt dl ritual dla trasmiscion di mic y dla lijëndes ladines coche patrimone culturel imateriel dl‘UNESCO.
Dan passa trëi ani à la Uniun Ladins Val Badia metù man de si scumenciadiva a njinië ca la candidatura dla lijëndes ladines per unì tëutes su tl patrimone culturel imateriel dl‘UNESCO. Tres la cunlaurazion de plu persones, l sustëni dl coordinadëur dla scumenciadiva Carlo Suani y l cuntribut fundamentel dla cunlauradëura dl Ciamp pedagogich Susy Rottonara iel unì metù adum na documentazion de materiai n cont dla lijëndes (LPA à comunicà). Petrillo, tituler dla catedra UNESCO al‘Università Roma Unitelma Sapienza, ie unì nciarià cun la scritura dl dossier de candidatura. Sën ie l dossier finà, y l Di dla cultura ladina à pità l cheder ideél per sëurandé la documentazion, che ti unirà pona mandeda al Ministere Talian dla Cultura. L guviern talian fej ora i tëmps per prejenté l dossier ala cumiscion mundiela UNESCO.
Do i trëi referac scientifics iel stat na mëisa turonda cun l titul "L’atualità dla lijëndes ladines per la cumenanza ladina y nia ladina", pra chëla che l à fat pea Fabio Chiocchetti, Clara Mazzi, Cesare Poppi, Roland Verra y Ruth Videsott.
red
