L Cunsëi scolastich provinziel nuef ie tlo per i cater ani che vën
De ndut iel 63 cumëmbri te Cunsëi scolastich provinziel, che à la funzion de ti dé cunsulënza ala Jonta provinziela y ala trëi direzions provinzieles de scola.
BULSAN (USP). La Jonta provinziela à numinà i/la cumëmbri/es dl Cunsëi scolastich provinziel nuef per l tëmp danter l 2025/2026 y l 2028/2029. Passa sessanta reprejentantes y reprejentanc di ciamps dla furmazion y dla cumenanza fej pea te chësc gremium de cunsulënza.
L Cunsëi scolastich provinziel nuef ie n gremium zentrel de cunsulënza per la direzions de furmazion y la Jonta provinziela. L se dà ju cun cuestions fundamenteles tl ciamp dla scolina y dla scola, dà ju arac y ejaminea prupostes de lege tl ciamp furmatif. Nscila pòrtel pro dassënn che l sibe n bon svilup dl sistem furmatif de Südtirol.
Tl gremium iel laite i assessëures per la scola Daniel Alfreider, Philipp Achammer y Marco Galateo y i trëi ntendënc. Oradechël iel tlo diretëures y nsenianc de scola, personal dla furmazion che ne nsënia nia, genitores, sculées y sculeies y i chemuns; reprejentà iel nce l’economia, la Università Liedia de Bulsan y la cëses di studënc.
Te Cunsëi scolastich provinziel iel de ndut 63 cumëmbri. L ie mpartì ite te na adunanza generela y te trëi repartizions che ie respetivamënter tachedes ite ala grupa de rujeneda ladina, taliana y tudëscia.
red
