Prim cunferimënt dl pest "Merit Ladin" ai 21 de setëmber
N l Di dla Cultura ladina vëniel cunferì per l prim iede l “Merit Ladin“ y premià y sëurandat l’opra d’ert crissa ora tres cuncors Ert X Merit Ladin
SAN MARTIN DE TOR (USP). L Di dla Cultura ladina vën giaurì dala 9.30 cun n simposium scientifich tl Istitut Ladin Micurá de Rü sun la tematica "Lijëndes y mic dla Ladinia" n ucajion dla candidatura per l’arpejon culturela imateriela dla UNESCO. Do n domesdì creatif tl Museum Ladin ti sëurandajerà l Presidënt dla Provinzia Arno Kompatscher y l Assessëur Daniel Alfreider al linguist Lois Craffonara l Merit Ladin, Gregor Prugger unirà premià per avëi venciù l cuncors artistich Ert X Merit Ladin y chël
n dumënia, ai 21 de setëmber,
dala 17.30
tl Museum Ladin Ciastel de Tor
a San Martin de Tor.
Dala 20:00 scumëncia tla sala dl Istitut Ladin n salon culturel, na manifestazion interdisziplinera y descursiva che trata la lijëndes y i mic ladins cun mujiga, leteratura y cuntribuc artistics. L Di dla Cultura ladina fina via sun plaza dan l Istitut Ladin cun mujiga dal vif.
L Di dla Cultura Ladina pieta la ucajion de scuvierjer deberieda la cultura ladina te duta si richëza y diversità cun leteratura, ert, mujiga, reprejentazions de performance y mumënc interatifs. La scumenciadiva nasc dala culaburazion dla istituzions cultureles ladines cun la unions y lies. L Di dla Cultura ladina ie na gran festa culturela y daviert per duc.
Detai dl prugram: news.provinz.bz.it/de/news/tag-der-ladinischen-kultur-2025-das-programm-im-detail
red
