Gran entusiasm por le concurs artistich Ert X Merit Ladin
33 artistes y artisć á tut pert al pröm concurs “Ert X Merit Ladin - Le davagnadú é Gregor Prugger - La premiaziun sará ai 21 de setëmber tl Museum Ladin tl cheder dl “Di dla Cultura Ladina”
BULSAN (LPA). Le concurs artistich nü Ert X Merit Ladin, metü a jí dla lia “Südtiroler Künstlerbund” en colaboraziun cun la Direziun Istruziun, Formaziun y Cultura Ladina, á te süa pröma ediziun albü n gran suzes. N bel numer de artistes y artisc ladins profescionisc á tut pert cun sües operes por ti fá onur al davagnadú dl Merit Ladin, che é chësc ann le linguist Lois Craffonara.
L'obietif dl concurs ê chël da chirí fora na opera d'ert da surandé sciöche pest de reconescënza por le laur de na vita de Lois Craffonara, en gaujiun dla surandada dl Merit Ladin.
La iuria, metüda adöm da Aron Demetz (presidënt de La Vëta), Katharina Moling (direturia dl Museum Ladin), Iaco Rigo (presidënt dl'EPL - Ert por i Ladins), Eva Gratl (vizepresidënta) y Alexander Zöggeler (presidënt dla lia “Südtiroler Künstlerbund”), á chirí fora danter 33 operes le laur dl artist Gregor Prugger.
L’artist, nasciü a Urtijëi dl 1954, á frecuenté la Scora d'Ert a Urtijëi y plü inant l'Academia d’Ert a Firenze. Indô zoruch te Gherdëna ál arjunt le diplom da maester artejan. Dai agn nonanta incá mëtel fora sües operes sides tla Talia co foradecá te mostres personales y coletives. Chëstes se desfarenziëia por na simbologia tlera, n lingaz dl’imaja poetich y n ecuiliber danter idea y artejanat: na sintesa de scemplité estetica y profondité de contignü, che é buna da aziché sides la sfera emozionala co chëra inteletuala.
L’opera d’ert chirida fora gnará presentada ofizialmënter y surandada a Lois Craffonara, linguist renomé, ai 21 de setëmber 2025, dales 17.30, en gaujiun dl Di dla cultura ladina tl Museum Ladin Ciastel de Tor a San Martin de Tor.
Cun l‘onoranza Merit Ladin vëgnel premié na personalité ezelënta, che á contribuí cun so laur ala promoziun y al sostëgn dl'identité ladina y che á albü n gran influs ince sura i confins dla comunité ladina fora.
Le concurs Ert X Merit Ladin n'ó nia ma valorisé n impëgn straordinar, mo ince stimolé le confrunt artistich y ester n sëgn atif de coejiun culturala.
red
