La Provinzia de Balsan plüra Hugo Valentin
Da pert dl presidënt Kompatscher reconescimënt por l’impëgn dl politich y gran sostignidú di ladins
BOZEN (LPA). Le presidënt Arno Kompatscher y la Junta provinziala á tut sö cun gran dolur la noela dla mort de Hugo Valentin. Por dezens á Hugo Valentin albü n rode important tla vita politica y culturala dla Ladinia y de Südtirol.
Nasciü ai 28 d'aurí dl 1938, á Hugo Valentin studié sciënzes agrares y é sté mëmber dl Consëi provinzial de Südtirol y dl Consëi regional dl Trentin-Südtirol dal 1978 al 1993. Al é ince sté mëmber dla Junta provinziala dal 1984 al 1989 cun a ce Silvius Magnago y dal 1993 al 1994 sot a Luis Durnwalder. Te chësta funziun s'ál dantadöt dé jö cun y por le sistem scolastich y universitar, les scolines, le sport scolastich y les istituziuns y lies culturales. Ince defora de söa ativité politica s'ál dé da fá por la cultura ladina, insciö ince sciöche presidënt dl Istitut Ladin "Micurá de Rü".
"Cun Hugo Valentin pordunse n realisadú, na porsona che s‘á dé da fá cun lungimiranza, coerënza y elocuënza por la parificaziun di lingac dla provinzia, y che á renforzé le sistem scolastich y cultural ladin", spliga le presidënt Arno Kompatscher. "L’impëgn de Hugo Valentin por le grup linguistich ladin, söa afeziun ala patria, süa afidabilité y so sëns de responsabilité politica gnará recordá ince tl dagní. Mies condolianzes plü sintides a süa familia te chësc ri momënt".
red/pio
