Di dla Cultura Ladina: l program tl detail
L ie unì prejentà i details dl program dl "Di dla Cultura Ladina" n dumënia ai 21 de setëmber a S. Martin de Tor: leteratura, ert, mujiga y program creatif da pudëi fé pea
BULSAN/S. MARTIN DE TOR (USP). Te na cunferënza stampa à l'Assessëur Provinziel per l’Istruzion y la Cultura ladina, Daniel Alfreider, y l diretëur dl’Intendënza y Cultura ladina, André Comploi, deberieda cun l team de urganisazion – Nadia Moling, Carlo Suani y Sofia Stuflesser – prejentà i details dl "Di dla Cultura Ladina".
Tl cheder dla preparazion ala candidatura per l recunescimënt coche bën imateriel dl’UNESCO, sarà "Mic y lijëndes" l argumënt zentrel dl Di dla Cultura Ladina n dumënia ai 21 de setëmber. N possa se ncunferté sun n program rich cun leteratura, ert, mujiga, performance, lauratueresc y ativiteies interatives.
"L mond dla lijëndes y di mic à senià sibe la vita da uni di che nce la cuscienza dla jënt ladina. Pra l Di dla Cultura Ladina uderons coche les nfluenzea mo al didancuei formes d’esprescion cultureles d’uni sort", auza ora Daniel Alfreider. Y André Comploi njonta: "L sarà na festa creativa, ulache l unirà pità ativiteies d’uni sort per duc – nce per jënt nia ladina. L’ert y la cultura ladina puderà unì descurida y vivuda cun duta si sfumadures."
La giaurida: simposium scientifich tl Istitut Ladin Micurá de Rü
Tl Istitut Ladin scumëncia dala 9.30 n simposium scientifich n cont dl argumënt zentrel dl di cun cuntribuc de Pier Luigi Petrillo (Università La Sapienza a Roma) – respunsabl per l dossier de candidatura UNESCO –, espertes y esperc coche Ulrike Kindl (Università Unieja), Giovanni Mischí y – te na mëisa turonda meneda da Ruth Videsott (Università Liedia de Bulsan) – Fabio Chiocchetti, Clara Mazzi, Cesare Poppi y Roland Verra. Moderazion: Nadia Moling.
La festa: domesdì creatif und sëurandata dl Merit Ladin tl Museum Ladin
Dala 14.00 saral tl Museum Ladin Ciastel de Tor n domesdì creatif cun truepa ativiteies interatives. Ti salamënc defrënc dl Museum – y n pert nce paralel – pieta truepa urganisazions y lies cultureles defrëntes n program rich per pitli y granc.
N lauratuere de scrì cun Nadia Rungger (revista Gana), atelier de pitura cun Fernando Brunel (Union di Ladins de Fascia), ilustrazion creativa cun Silvia Baccanti y marcià di libri (Uniun di Ladins Val Badia), Performance interativa Potato Talks de Mirna Bamieh (Biennale Gherdëina), mostra cun Albert Mellauner y Anna Maria Mayr y letura de poejies de Simon Josef Rubatscher (EPL – Ert por i Ladins), cianté te n cor cun Erika Mussner y Martina Rifesser (Comunanza Ladina de Bulsan), letura interativa de lijëndes cun Erica Senoner y Otto Dallago, nterpretazion mujighela de lijëndes cun Alberta Rossi, Rebecca Sandri, Roberto Dellantonio y Stefano Caniato (Union di Ladins de Gherdëina), prejentazion dl liber "Lijëndes Ladines dles Dolomites" cun Milva Mussner y cuntedes de lijëndes cun Simon Kostner (Union Generela di Ladins dles Dolomites), vijites interatives tl museum, danter l auter cun l juech detective per mutons (Museum Ladin), vijites menedes tla "Val dl’Ert" (SMACH) y prejentazions de films defrënc (La Vëta y d’autra lies). Sëuraprò uniral metù ora dessënies y pitures dl zënter soziel La Spona, che ie unides fates aposta per la ucajion y che ie ispiredes dala lijëndes y dai mic dla Ladinia.
Dala 17.30 Uhr uniral prejentà i resultac di lauratueresc y d’autra scumenciadives interladines coche la Parola Ladina dl’Edema. N mumënt zentrel sarà la premiazion dla uneranza "Merit Ladin" a Lois Craffonara y la premiazion dl cuncors Ert X Merit Ladin (deberieda cun l Südtiroler Künstlerbund) cun la sëurandata dl’opra d’ert dedicheda ala persona premieda.
Do la 18.30 jirà la festa inant tl zënter dl luech: sun plaza dan l Istitut Ladin piterà la lies "Adüm" y "Cultura da Munt" da maië y da bever.
L Salon Culturel: leteratura, mujiga, ert y performance tl dialogh
Tla sënta dl Institut Ladin saral dala 20.00 inant l Salon Culturel: na manifestazion interdisciplinera n cont di mic y dla lijëndes ladines cun cuntribuc de mujiga, leteratura y ert. Letures curtes dl‘autores Rut Bernardi, Silvia Liotto, Alberta Rossi y Iaco Rigo se barata ju cun mujiga dla grupa GOTA (Katia y Jan Moling), la curadëura Katharina Moling rejona cun Silvia Baccanti (artista dla pitura te sala) y Christian Verginer (artist dla scultura), l atëur Lukas Spisser reziterà lijëndes. Na particularità sarà la prima prejentazion dla performance "L fova n iede": n "canto diviso per balarina, percuscionist y fixed media" dl cumponist ladin Eduard Demetz, nterpretà da Anastasia Kostner y Hannes Vonmetz. Martina Rier menerà tres la sëira.
L Salon Culturel unirà tëut su dala RAI Ladinia y lascià jì tl radio y tla televijion.
Musiga anterores: mujiga dal vif y sté deberieda n cumpania
L Di dla Cultura Ladina fina via cun "Musiga anterores": dala 21.30 inant puderan scuté su mujiga dal vif dla grupa ladina Louis & The Space Travellers sun plaza dan l Istitut Ladin, stajan deberieda n cumpania.
Nfurmazions de utl: ntreda debant, pitla curiera
La ntreda per duta la manifestazions ie debant. L ie da paië per l maië y l bever.
Bele da marënda cunlierà na pitla curiera dla SASA l zënter dl luech de S. Martin cun l Museum Ladin. N possa furné pea debant, zënza messëi se cruzië ulà lascé l auto.
L "Di dla Cultura Ladina" ie na scumenciadiva dla Direzion dla Ntendënza y Cultura dla Provinzia Autonoma de Bulsan – Südtirol n cunlaurazion cun la istituzions cultureles ladines – dantaldut l Istitut Ladin Micurá de Rü y l Museum Ladin Ciastel de Tor – cun la partezipazion dl’Università de Bulsan, i Istituc Ladins Majon di fascegn y Cesa de Jan, la Union Generela di Ladins dla Dolomites, la Unions di Ladins dla singula valedes y la lies cultureles dla valedes ladines.
red
