“Di dla Scola Ladina 2025”: cunfront y ideies per l ann de scola nuef
L “Di dla Scola Ladina”, che ie urmei bele tradizion da truep ani incà, ie nce chëst ann unì a s’l dé, chëst iede a La Ila ai 29 de setëmber
LA ILA – L “Di dla Scola Ladina”, che ie urmei bele tradizion da truep ani incà, ie nce chëst ann unì a s’l dé, chëst iede a La Ila ai 29 de setëmber. Chësta manifestazion à cunlià l personal nseniant y pedagogich de duta la scoles y solines ladines, per se baraté ora n cont de vijions, esperienzes y proiec dan l scumenciamënt dl ann de scola. Pra l’ancunteda al fat pea zirca 220 persones.
Ntan l di iel unì a s’l dé Pro-Action-Cafés, de pitla grupes de lëur per rujené, se giamië ora ideies y crì soluzions cuncretes. La jënt che à fat pea se à fat pensieres coche n possa mëter n droa la linies guida uperatives dl Profil furmatif dla scoles ladines, n documënt publicà tl 2024 y frut de n dialogh costant danter la Direzion provinziela dla Scola ladina y la direzions dla scoles, che tol ite vijions, valores y traverc per mené l’evoluzion dl sistem furmatif ladin, che ie da liejer sun la plata internet dl’Intendënza Ladina https://scora-ladina.provinzia.bz.it/lld/scora/nosc-profil.
Ntan l danmesdì iel unì fat 17 grupes de lëur che à laurà ora prupostes uperatives n cont de argumënc zentrei coche l mparé autonom, la competënzes tle per l daunì y la promozion cuncreta dla rujeneda ladina tla vita de scola da uni di. La ideies che ie unides adum unirà daldò metudes a desposizion de duta la scoles y scolines ladines.
“L Di dla Scola Ladina ie na ucajion mpurtanta per se ancunté coche cumenanza de istruzion y furmazion per se baraté ora n cont dla esperienzes y ponc d’ududa, y per renfurzé la cunlaurazion danter duta la scoles ladines. Nosc sistem scolastich ladin ie unich te Südtirol, n pudëssa dì “europeich”, pervia dl plurilinguism, y donca scialdi cuntemporan”, à auzà ora l Assessëur per l’Istruzion y la Cultura Ladina Daniel Alfreider, rengrazian duc i cumëmbri dl mond dl’istruzion ladina.
L ntendënt Heinrich Videsott: “Te n tëmp ulache n rejona y scrij truep dla cumplessità dl nseniamënt y dla ndesfidedes tl setor dl’istruzion iel tler che nsenianc y personal dla solina rejone n l Di dla Scola Ladina de pusciblteies nueves y dl svilup tl lëur de furmazion. L ie tradizion che ntan chësc di vëniel cialà tl daunì per vester njiniei l miec che la va ala ndesfidedes nueves.”
red
