Jus, Alfreider: “Postaziuns radar por sostigní i Comuns"
L’assessur provinzial Daniel Alfreider á porté dant chestiuns problematiches y mosüres por la gestiun dl trafich söi jus dl Südtirol. Duicënt domandes da pert di Comuns por autovelox.
BOLZANO (USP). “I orun sostigní i Comuns y la polizia de Comun tla gestiun dl trafich sön i jus dolomitics, mo al ó ester tlerëza a livel normatif da pert dl Ministere competënt, por ci che reverda la prozedöra por l'aprovaziun di radar y süa omologaziun.” Chësc á dit ciamó n iade incö l'assessur ala Mobilité y ales Infrastrotöres dla Provinzia Autonoma da Balsan, Daniel Alfreider, che á mostré sö ti detais les poscibilités iuridiches che reverda la gestiun dl trafich söi jus dolomitics dl Südtirol. Pro la conferënza stampa êl ince le diretur dl Departimënt Infrastrotöres y Mobilité Martin Vallazza y le presidënt dl Consorz di Comuns dl Südtirol Andreas Schatzer. L'assessur Alfreider á alzé fora sciöche ai é aumentá te na manira esponenziala, ti ultims dui agn, i caji de gares de auti nia autorisades sön i jus dolomitics. “L'ultim caje vá zoruch ales 23:30 de mertesc, ai 30 de messé, söl Ju de Frara, olache al é jü debojëgn cinamai dl intervënt di stödafüch volontars” á splighé l'assessur competënt. “La situaziun n'é nia plü da tigní fora, y sambëgn ne podunse gnaca ponsé che les forzes dl ordin y la polizia de Comun pois sté söl laur 24 ores sön 24 por contrasté le fenomen dles gares cun auti de nöt” á splighé Alfreider.
Sorts de control
La competënza por i controi dla velozité é dles forzes dl ordin: Polizia, Carabiniers y la Polizia de Comun, chi che fej controi mobii, cun aparac speed-check y cun autovelox fisc. Alfreider á alzé fora che tl Südtirol él al momënt ma un n autovelox fis, posizioné söl Ju dl Rombo. Dai Comuns dl Südtirol, indere, ti él gnü mené ite, cina incö, 200 domandes al Comissariat dl Govern, che pó aprové - tres decret - la domanda o la refodé, do na verifica: i un debojëgn de tlarëza da pert dl Ministere competënt, savëi ci y co che i podun fá respet a na situaziun che n'é nia plü da tigní fora” á injunté Alfreider. Avisa por chësta rajun, l'edema passada, á l'assessur Alfreider incunté le sotsecreter de Stat Tullio Ferrante por baié dla chestiun dla prozedöra de domanda por i radars fisc – deache l'omologaziun di radars se damana tröpa fadia y comporta ince malsegurëza.
Control dla vera
Le diretur dl Departimënt Infrastrotöres y Mobilité, Martin Vallazza, á tlarí les normatives preodüdes dal Codesc dla strada sön i controi dla vera. “Ara se trata de n problem atual ince tla provinzia de Balsan” á splighé Vallazza. “Le Codesc dla Strada ne stabilësc nia n limit de decibel uniform che vel a livel nazional, y ma les manipolaziuns ai mesi che vëgn desmostrades é sotmetüdes a sanziuns” á splighé le diretur de Departimënt, injuntan che les forzes dl ordin y la polizia locala pó fá controi cun aparac zertificá che mosüra sce le limit dla vera vëgn superé o manco, mo spo pó na sanziun gní dada ma sce le meso é gnü manipolé. “I orun renforzé i controi söl teritore y porchël metunse ince a desposiziun le personal de nosta motorisaziun, por ti dé n sostëgn tecnich ales forzes dl ordin y ala polizia de Comun” á stlüt jö le diretur Vallazza.
Camper abusifs y plazes da parché fora de paisc
Le presidënt dl Consorz di Comuns dl Südtirol, Andreas Schatzer, á mostré sö le cheder iuridich che reverda les plazes da parché fora di paisc y dantadöt la chestiun che reverda i “camping salvari” - sciöch’ ai vëgn cherdá. “Les ordinanzes vëgn scrites dant dai comuns y prevëiga la proibiziun da parché y l’arlontanamënt dl camper, cun straufunghes cina a 500 euro. Ince te chësc caje él ri da garantí controi tresfora, por situaziuns che porta tres indô a incuinamënt gaujé dal refodam lasciá zoruch. I camper abusifs é n problem por nüsc Comuns, chi che dëss gní sostignis te sües iniziatives da vignidé” á dit Schatzer.
tl/cs
