Onoranza nöia: "Merit ladin"
La Junta provinziala a aprové l’istituziun dl pest Merit Ladin, che premiëia miric straordinars tla inrescida, tla istruziun y tla creaziun artistica tl ciamp dl lingaz y dla cultura ladina
BULSAN (USP). Le pest Merit Ladin gnará porté ite por valorisé miric straordinars tl ciamp dla inrescida scientifica, dla promoziun y dles ativités artistiches tl ciamp dla cultura y dl lingaz ladin. La Junta provinziala l’á deliberé te süa sentada di 29 de messé, sön proposta dl assessur provinzial Daniel Alfreider.
“Cun chësta onoranza gnarál premié les personalités che á contribuí – cun so laur – ala promoziun y al sostëgn dl’identité ladina, sides tres l’inrescida, la formaziun o l’ert, y che á ince albü n impat sura la comunité ladina fora” sotrissëia l’assessur por la scora y cultura ladina Alfreider.
Le pest ti gnará surandé a personalités che á arjunt miric ezelënc te almanco un de chisc ciamps: inrescida scientifica de funz sön le lingaz, la storia y la cultura ladina; promoziun y formaziun: svilup y divulgaziun dl lingaz y dla cultura ladina, en particolar te n contest scolastich, universitar o extra scolastich; ert y creativité: ativités artistiches de prestisc internazional, che consolidëia y promöi cun creativité l’identité ladina.
Le pest ti pó gní surandé a personalités che vëgn da öna dles cinch valades dolomitiches ladines o che á n liam particolar cun chëstes. La seleziun gnará fata da na comisciun de esperc, che gnará nominada ti proscims dis dal Diretur dl’Intendënza y Cultura ladina André Comploi, metüda adöm da rapresentanc dl’Intendënza y Cultura ladina, dal Istitut Cultural Micurá de Rü, dal Museum Ladin, dla seziun ladina dl’Université Lëdia de Balsan y n rapresentant di dui Istituc culturai Majon di Fascegn y Cèsa de Jan.
”I sun contënt che tl dagní gnarál valorisé ofizialmënter contribuc ejemplars y miric straordinars tl ciamp dla cultura y dl lingaz ladin cun la surandada dl pest Merit Ladin tla forma de n atestat rapresentatif dl Südtirol”, spliga le diretur dl’ Intendënza y Cultura ladina André Comploi. Paralelamënter gnarál realisé dala lia “Südtiroler Künstlerbund”, en sinergia cun l’Intendënza y Cultura ladina y cun la partezipaziun de organisaziuns artistiches ladines le concurs artistich Ert X Merit Ladin. L’opera d’ert chirida fora da na iuria ti gnará surandada ala porsona che ciafa le Merit Ladin.
La pröma premiaziun dl Merit Ladin gnará tignida ai 21 de setëmber 2025 tl cheder dl Di dla Cultura Ladina.
mac/red
