La ezelënzes dl ulentariat dla junanza tl’Euregio ie unides premiedes
Tl Self Depero a Trënt iel stat la zeremonia pra chëla che l ie unì dat ora atestac de merit
Trënt (USP). N recunescimënt che valorisea l mpëni di ulenteres jëuni ti trëi raions dl’Euregio: l pest “Prestazions d’ezelënza – ulentariat tla junanza” vën dat ora uni ann cun la cunlaurazion danter la Provinzies autonomes de Trënt y Bulsan y l Land Tirol per resultac arjonc tl ciamp dl ulentariat. I atestac de merit ie unii sëurandac chëst’ena, ntan na zerimonia ufiziela tl Self Depero dl Palaz che ie la sënta dla Provinzia autonoma de Trënt, a vint jëuni nchin a 35 ani per si mpëni persunel, a cin’ pruiec che promuev l ulentariat tl setor di jëuni y a na scumenciadiva sëura la sëides stateles ora, che uel crië rëies y barac tla Euregio dedite.
L assessëur per la politiches per la cësa, per l patrimone, per l demane y per la prumuzion dla cunescënza dl’autonomia Simone Marchiori à sotrissà la mpurtanza de recunëscer l valor dl’ativiteies de ulentariat: "Aldò dla tradizion che à si ravises tl Land Tirol à nce la Provinzia autonoma de Trënt dal ann 2022 incà tëut su chësta scumenciadiva, per valurisé l mpëni raiunel dla generazions nueves, a bën de duta la cumenanza, cun la ideazion de na unerefizënza aposta per l ulentariat dla jëunes y di jëuni dedite dl’Euregio. A pudëi udëi i jëuni che se mët a despusizion di autri nes lascia pro de ntënder che chësta maniera de fé vën data inant da generazion a generazion: ti pité n servisc ala cumenanza toca pra nosc DNA y ie una dla seves che à si fundamënta te nosta identità, coche forza ntrinseca dl’autonomia speziela che nosta Provinzia à,” àl dit.
Pra la zeremonia àl fat pea truep reprejentanc dla lies de ulentariat y dla istituzions di trëi raions, danter chisc l vizepresidënt dla Provinzia autonoma de Bulsan y assessëur per la furmazion y cultura ladina, per la nfrastrutures y la mubltà Daniel Alfreider, che à dit: “I jogn á debojëgn da s'incunté, da sté adöm, da se devertí te na manira sana, da fá ativités recreatives alaleria, da imparé da anuzé y gestí i posc che ti vëgn metüs a desposiziun y da se tó sö responsabilités aladô de süa eté. Döt chësc é poscibl por mirit de Nëus Jëuni Gherdëna y dl Sorvisc ai Jogn Val Badia, che acompagnëia cun profescionalité y dantadöt ti orëi bun a desënes y desënes de jogn y jones fora por le tru de chersciüda personala, relazionala y soziala.”
Prejënt nce l capitan dl Tirol Anton Mattle, che à dit: “Chësc recunescimënt premieia jëunes y jëuni nchin a 35 ani che se à fat valëi y udëi per si mpëni. Premià iel nce unì pruiec – danter chisc n pruiet transfruntalier tl’Euregio Tirol-Südtirol-Trentin – che promuev l ulentariat tl setor di jëuni. N gran rengraziamënt y recunescimënt ti va a dutes y duc che ie unii premiei, che ti dà n cuntribut preziëus ala sozietà, per na cumenanza viva y sterscia.”
red/dl
