Ju de Valparora: dai 14 de jügn inant deura indô la strada
La strada provinziala SP37 gnará indô en pert daurida al trafich, sciöche aladô dl program. Le trafich gnará regolé te na direziun unica alternada a na moda che i laurs pois jí inant.
BADIA (OSP). I laurs por mëte al sigü le toch de strada dl Ju de Valparora dala pert dl Südtirol vá inant aladô dl plann stabilí dai ofizi competënc dla Provinzia autonoma de Balsan. Ince sce les condiziuns dl tëmp n'é nia propi stades dër bones jarára impó da daurí indô al trafich la strada provinziala LS37 te na direziun unica alternada. Sciöche l'assessur provinzial por la mobilité Daniel Alfreider á alzé fora é i laurs de importanza fondamentala por garantí la segurëza de düc che che passa sön chësta strada. "Al é important che al vëgnes tigní ite i tëmps odüs danfora por che ara vais indô da passé por le Ju de Valparora tratan i mëisc da d'isté" s'á tut a dí l'assessur.
L'Ofize tecnich strades nord/ost confermëia che da en sabeda, ai 14 de jügn dl 2025 inant gnarál indô daurí en pert la strada pori auti. Le trafich gnará regolé te na direziun unica alternada a na moda che i laurs pois jí inant.
I tecnics competënc, cun a ce le responsabl unich dl prozedimënt Davide Ziller, racomana da mëte dër averda ales tofles stradales y da respeté les indicaziuns dl personal che laora tl cantier. Al vëgn ince rengrazié les porsones che vir tl comun dailó dlungia, i turisc, les dites y les aziëndes por la paziënza y la colaboraziun tratan chësc tëmp olache al é gnü fat laurs.
I ajornamënc sön le trafich y sön coche i laurs vá inant gnará comunicá por tëmp.
gm/uv
