Ince chësc isté indô: cun le abo+ debann tl museum
Mituns y mitans, jogn y jones pó jí a ti ciaré debann a 55 museums o posć d'esposiziun cun so abonamënt dl trasport publich – l'aziun pëia ia ai 14 de jügn
BALSAN (OSP). Vigni porsona che á n abo+, l'abonamënt por le trasport publich por scolars y scolares, lerneri y lerneres, sciöche ince por studënc y studëntes cina 26 agn, pó jí a ti ciaré debann tratan l'isté dl 2025 a tröc museums y posc d'esposiziun te döt le Südtirol. L'aziun "Summer Museum", che vëgn organisada chësc ann bele le 11ejim iade dal Ofize Museums y inrescida museala, pëia ia ai 14 de jügn y vá inant cina ai 7 de setëmber. Ince la Repartiziun Mobilité y la STA (Strotöres dl trasport dl Südtirol S.A.) sostëgn chësta scomenciadia. "Nüsc museums é dantadöt por nüsc mituns y nostes mitans y la jënt jona posc interessanc y demorvëia olache an impara tröp sön i aspec desvalis de nosc presënt y nosc dagní. L'aziun da d'isté é propi na bela ocajiun por descurí val' de nü y imparé a conësce damí nosta provinzia", dij l'assessur provinzial Philipp Achammer cun convinziun.
La maiú pert di museums y di posc d'esposiziun arjunjon cun i mesi dl trasport publich y chël ó dí cun l'abo+. Pro chisc toca por ejëmpl les ciases di parcs nazionai aquaprad (a Prad am Stilfserjoch), avimundus (a Schlanders), culturamartell (te Martell), naturatrafoi (a Trafoi/Stilfs) o lahnersäge (a St. Gertraud/Ulten). An pó ince jí a ti ciaré al Museums di minerai a Teis (te Funes), al Museum provinzial dles usanzes y dles tradiziuns (a Dietenheim/Bornech) o al Museum di lëgns da ordöra (a Lana). Na suravijiun completa de düc i museums y di posc d'esposiziun che fej para al'aziun d'isté é da ciafé sot https://museen.provinz.bz.it.
red/ck
