"Behind the book": Mostra tl la biblioteca provinziala Teßmann
La mostra "Behind the book" inviëia da osservé le liber da na prospetiva nöia
BULSAN (USP). La mostra "Behind the book" inviëia da osservé le liber da na prospetiva nöia - sciöche n oget conzepí cun cura, olache vigni pice particolar - grafich, material, visif - porta pro a fá dla letöra n'esperiënza unica.
Le proiet de studëntes y studënc, realisé dala Facolté de Design y Ert dl'Université Lëdia de Balsan en colaboraziun cun la Biblioteca provinziala Dr. Friedrich Teßmann, ti ciara al liber te sües dimenjiuns creatives, sensuales y tecniches. I plü bi libri, che vëgn premiá vigni ann dala Stiftung Buchkunst y che la Biblioteca Teßmann chir fora da cumpré, á dé l'impuls da fá pié ia chësc proiet che rapresentëia tl medemo tëmp n'introduziun al design dl liber.
Ci él pa che fej bel n liber? A pröma odüda él dessigü le cuertl y la manira particolara de sciöche les plates é liades adöm. Sce an ti ciara avisa él ince la cualité dl papier, la tipografia, la sort de scritöra y sciöche ara é partida sö sön les plates, la coloraziun, les ilustraziuns y le format che porta pro ala faziun che le liber á en general - düc chisc aspec sostëgn y alza fora ci che le test ó nes dí.
La mostra presentëia chisc aspec dl design dl liber sön cater isoles tematiches. Adinfora vëgnel n panorama ampl dl'ert dl cherié n liber, che ne vëgn nia ma gní lit, mo a n liber ti ciaron dantadöt y an le pëia ite.
red/ck
