Scores elementares ladines: stlüt jö le proiet "Scora movimentada"
Le Departimënt Intendënza y Cultura ladina á orü sperimenté modalités nöies d’integraziun dl movimënt tla vita scolastica da vigni de, tres le proiet pilot "Scora movimentada".
SANTA CRISTINA/MAREO (USP). Le proiet á metü man tl ann scolastich 2021/2022. Al é gnü realisé tles scores elementares de Santa Cristina, por Gherdëna, y de Al Plan de Mareo, por la Val Badia, cun le fin da bun integré l’ativité fisica tla routine scolastica, tres impulsc de movimënt danter les ores de scora, tres ativités de movimënt portades ite tles leziuns (por ejëmpl "detac en movimënt") y cun l’ampliamënt dles ocajiuns da se möie tratan les palses. Incër 40 insegnantes y insegnanc á tut pert regolarmënter ai cursc de formaziun pitá dai insegnanc de educaziun motoria Lorenz Clara y Emanuel Gravino.
L'assessur ala Formaziun y Cultura ladina, Daniel Alfreider, sotrissëia: "Le movimënt renforza la sanité, la conzentraziun y les facoltés inteletuales. Nia dötes les families ne pó ti pité a sü mituns y mitans ativités sportives assá fora dla scora. Por chësta rajun aprijiëii dër le proiet 'Scora movimentada': al porta ite n valur dër significatif, dantadöt por chi che ne fej nia tröp movimënt. Le proiet passenëia idealmënter cun le program porté ite tles scolines ladines por na alimentaziun sana, 'Mangé bun, sann y natural te scolina'. Alimentaziun y movimënt é pilastri fondamentai che un intenziun da renforzé inant por promöie le bëgnester de nüsc mituns y jogn. I rengrazi i insegnanc spezialisá y dötes les insegnantes y insegnanc che á realisé cun impëgn chësc proiet."
Le proiet é gnü stlüt jö ai 24 de ma cun la manifestaziun "Vire nosta natöra" metüda a jí cun la partezipaziun di geniturs (a Santa Cristina gnarál trat do da d’altonn). Te deplü postaziuns á i mituns y adulc podü sperimenté te na manira lisiera temesc sciöche movimënt, natöra, sostenibilité y alimentaziun sana tres na ciacia al tesur, le pastelné cun materiai naturai, n quiz sön la sostenibilité y la preparaziun de na picia marëna sana.
"Chësc proiet, che á efec positifs sön le svilup de scolars y scolares, desmostra tan che le tema dl movimënt é interdisciplinar", dij Heinrich Videsott, diretur provinzial dles Scolines y Scores Ladines. "I sun contënc da avëi dé n impuls significatif cun chësc proiet y da avëi podü dé l’ejampl a d’atres scores de Südtirol."
"Scora movimentada" gnará proponü tl dagní te n format nü y al sará azessibl a n numer maiú de scores.
red/ck
