De de Departimënt dl’Intendënza y Cultura Ladina a Neustift
Colaboradus y les colaboradësses dl Departimënt Intendënza y Cultura Ladina rová adöm tl convënt de Neustift por n convëgn a portes stlütes
VARNA (USP). Ai 27 de ma 2025 é i colaboradus y les colaboradësses dl Departimënt Intendënza y Cultura Ladina rová adöm tl convënt de Neustift por n convëgn a portes stlütes. Le slogan dla manifestaziun é sté "nosta ciasa/nosta cësa – misciun da renforzé y planificaziun deboriada".
Le convëgn é gnü moderé dala esperta Sabina Frei. Tl zënter dl’atenziun él gnü metü i aspec spezifics dla cultura organisativa, dla comunicaziun y dla colaboraziun interna danter i ofizi y les direziuns, por ti garantí efiziënza y presënza a düc i interessá por chi che le Departimënt Intendënza y Cultura Ladina se mët a sorvisc.
"La popolaziun dles valades ladines se aspeta tlerëza, afidabilité y soluziuns costrutives da pert dl'aministraziun publica, dantadöt tl setur dla formaziun. Le convëgn pita na ocajiun importanta por tlarí - tres le dialogh - le rode y le contribut che le Departimënt dess ti dé al svilup formatif y cultural di ladins", dij l'assessur ala Formaziun y Cultura ladina, Daniel Alfreider.
Le Departimënt Intendënza y Cultura Ladina "é le punt de referimënt zentral dl grup linguistich ladin por ci che reverda les chestiuns de formaziun, scora y cultura", aladô dl decret dl presidënt dla Provinzia nr. 3 dai 7 de jená 2019, y al é al sorvisc de düc i mituns y les mitans, les families, i insegnanc y les insegnantes tan co i operadus culturai dles valades ladines.
"I un la responsabilité prinzipala tl manajé le sistem educatif ladin - dala scolina sö ala formaziun profescionala - por promöie, svilupé y mantigní i programs linguistics, culturai y les ativités dla jonëza tles valades ladines. L’obietif dl convëgn a portes stlütes é sté chël da identifiché deboriada i punc da mioré y les modalités por renforzé la colaboraziun interna y porté inant le miú che ara vá nosc mandat educatif y cultural", sotrissëia le Diretur dl Departimënt Intendënza y Cultura Ladina, André Comploi.
"Chëstes indunades nes dá la poscibilité da se dé jö, da ascuté sö y da mëte sön mësa les ghiranzes de düc y de dötes", spliga le Diretur provinzial dles Scolines y Scores ladines, Heinrich Videsott. "Dantadöt te n contest multilingual, él important nia ma da comuniché bun i contignüs, mo ince da tlarí adöm programs, responsabilités y punc d’incuntada."
red/ck
