Delegaziun ladina al convëgn söles mendranzes linguistiches a Davos
Colaboradësses y colaboradus dla Direziun Intendënza y Cultura Ladina s’á confronté tla Svizera söl plurilinguism y söles mendranzes linguistiches te n contest globalisé.
DAVOS (USP). Na delegaziun dla Direziun Intendënza y Cultura Ladina á tut pert dai 21 ai 23 de ma al Convëgn internazional "Plurilinguism y mendranzes linguistiches te n contest global" metü a jí a Davos dala Alta Scora Pedagogica di Grijuns (ASP GR). La conferënza á pité spunc interessanc por ci che reverda les inrescides y les pratiches atuales por la promoziun di lingac de mendranza.
Le convëgn s’á focalisé sön les dimenjiuns dl plurilinguism, dl translanguaging y dles mendranzes linguistiches, cun lapró ince i lingac di sëgns y i lingac locai, che é gnüs analisá te na prospetiva globala. Implü él gnü aprofondí i efec che la trasformaziun digitala – en particolar chëra dla inteliënza artifiziala (IA) – á söla promoziun dl plurilinguism.
"Le convëgn á dit fora ciamó n iade che le plurilinguism é na richëza culturala da sconé y da promöie ince tres le dialogh sura confin", á sotrissé l'assessur ala Formaziun y Cultura ladina, Daniel Alfreider. "Le confrunt danter la Ladinia y i Grijuns desmostra ci gran valüta che la colaboraziun alpina á, sce an ó ti dé plü visibilité, reconescimënt y prospetives tl dagní ai lingac de mendranza sciöche le ladin y le rumanc."
Danter les tematiches aprofondides tratan le convëgn êl ince chëra dl rode dla didatica pluringuala tla promoziun di lingac de scoraziun, valorisan tl medemo momënt düc i pröms lingac presënc te classa. “Tles scores ladines - spliga l’ispeturia por le plurilinguism, Claudia Rubatscher, - podess chësc gní sostigní, p.ej., ince tres proiec sciöche l’"AltRoparlante: didatica pluringuala tla scora primara y mesana", che é gnü presenté a Davos dal team de inrescida dl’Università per Stranieri di Siena, n proiet acompagné por la Direziun Intendënza y Cultura Ladina dal Ispetorat por le Plurilinguism adöm cun le Sorvisc por l’Inclujiun."
Tres süa partezipaziun á orü la Direziun Formaziun y Cultura ladina alzé fora so impëgn por realisé rëis educatives internazionales che sais da promöie percursc educatifs te deplü lingac a bëgn dles mendranzes linguistiches ponüdes ite tl contest globalisé d’aldedaincö.
red
