Euregio, viagë n ann alalongia zënta sëides te trëi raions
L ie unì fat ora y dat pro l Ticket Euregio per l trasport publich raiunel al priesc de 750 euro. L unirà dat ora, aldò dla previjions, de dezëmber dl 2025.
S. MARTIN DE TOR (USP). Viagë tl Tirol, te Südtirol y tl Trentin cun la ferata, cun la curiera y cun l mplant portamont n ann ntier alalongia cun na cherta sëula: l Ticker Euregio ie realtà. Chësc ie unì nunzià dal presidënt dl’Euregio y dla Provinzia autonoma de Bulsan Arno Kompatscher, deberieda cun l capitan dl Tirolo Anton Mattle y l presidënt dla Provinzia autonoma de Trënt Maurizio Fugatti, ala fin dla senteda di 21 de mei dla Jonta y dl’Aduneda dl Tirol-Südtirol-Trentin a San Martin de Tor tla Val Badia.
Aldò dla delibera data pro ai 21 de mei dala Jonta dl’Euregio, valerà l Ticket Euregio 12 mënsc alalongia dal di che n l compra. Duc i zitadins y duta la zitadines dl Tirol, de Südtirol y dl Trentin puderà cumpré la cherta zënza lim de età y puderà oradechël se n anuzé te duta l’Euregio dl trasport publich raiunel.
"Cunliamënc, sustenibltà y valor njuntà sëura la sëides ora"
La cherta dl’Euregio custerà 750 euro. "Chësc ie n priesc scialdi bon, cun n sparani de ades l 50% permez ai abunamënc anuei dl Tirol, de Südtirol y dl Trentin metui adum. L’Euregio va nscila mo n iede sëura i cunfins ora y fej nscila mo n var inant de viers de na majera ujinanza di zitadins, la cuoperazion y la vijibltà dl’Euregio tl spirt dla ntegrazion europeica,” à sotrissà l presidënt dl'Euregio Kompatscher. Nce l sëurastant dl Tirol Mattle ie dla cunvinzion che l abunamënt anuel nuef sibe scialdi de utl per chiche viagia regulermënter y che va suvënz cun i mesuns de trasport publics ti raions desferënc dl’Euregio: "Mandon nscila n messaje tler che son a una cun la mubltà sustenibla."
"L se trata de na finamira sun chëla che n aspitova bele ert, nce tl Trentin ie la tematica dl Ticket Euregio nteressant, dantaldut per i jëuni," à dit l presidënt dla Provinzia autonoma de Trënt Maurizio Fugatti: "Canche n rejona de cuestions cuncretes per i zitadins, iel propi te n tel cajo, ulache n ie boni de ti vester a rëms tecnics, che l’Euregio mostra coche la uebe fé unì plu daujin la jënt di 3 raions y ti pité a d’ëi n valor njuntà cuncret."
N vagun details, coche la maniera coche la cherta unirà venduda, muessa mo unì definii. Nce da chisc aspec vëniel a dì canche n puderà scumencé avisa.
Ntan la cunferënza stampa che ie stata do la reunions di organns suinsom l’Euregio, à i doi presidënc provinziei y l sëurastant dl Tirol nunzià che l’Euregio y l’aministrazions che la mët adum uel cialé che la cherta vele da dezëmber dl 2025 inant, canche l sarà l mudamënt di orares.
gst/dl
