I organns suinsom dl’Euregio tla Val Badia: la dezijions
Tla sentedes dla Jonta y dl’Adunanza iel unì definì strategies nueves per l EuregioFamilyPass y i pruiec Interreg. Pruiec per slargé la Lerch Andreas Hofer a Mantua
S. MARTIN DE TOR (USP). Ai 21 de mei a San Martin de Tor à la Jonta y l’Adunanza dl’Euregio Tirol-Südtirol-Trentin dat pro na lingia de deliberes che cëla de viers dl daunì. La plu mpurtantes ie unides prejentedes dal presidënt dla Provinzia autonoma de Bulsan y dl’Euregio Arno Kompatscher, dal sëurastant dl Tirol Anton Mattle y dal presidënt dla Provinzia autonoma de Trënt Maurizio Fugatti, te na cunferënza stampa ala fin dla doi sentedes.
L'Euregio à slungià de trëi ani l’acurdanza per l EuregioFamilyPass, à spiegà l presidënt dl’Euregio Kompatscher: "A una cun la Agenzies per la familia y i ufizies cumpetënc di trëi raions, ulons tò ite partners sëuraprò per chësta cherta de vantajes y pité na sauridanza finanziera mo majera ala families tl’Euregio." De cunseguënza iel unì tëut su la pruposta metuda adum dala Jonta spezialiseda dl’Euregio per la familia de merz dl 2025, che l presidënt Arno Kompatscher à prejentà tla Val Badia.
L'Euregio à nce mudà si strategia per fé pea pra i programs Interreg dl'UE. "Chisc programs – à dit l sëurastant dl Tirol Mattle – à la finamira de tò y tres la sëides y va nscila ite tl’idea plu sota dl’Euregio." Tenian cont che tosc, ai 1. de utober, tulerà l Land Tirol su la Presidënza dl’Euregio y tenian nce cont che l tiermul per dé ju la dumandes vën trat dant, à l’Euregio valutà l’esperienzes abudes pra pruiec coche Digiway, Cairos y Fit4Co. N à fat ora de se nuzé dla sinergies te na maniera plu efiziënta y deleghé la ncëries singules ala aministrazions di trëi raions.
L presidënt Fugatti à auzà ora particularmënter l lëur pra l Atlas storich digitel coche ejëmpl di truep pruiec preudui dal program de atività dl’Euregio: "Chësc pruiet ie bon de mëter n rë istituzions cultureles mpurtantes, de se nuzé dla truepa esperienzes tl ciamp storich y de giaurì, coche plataforma de referimënt a livel europeich, pruspetives nueves de cumunicazion y cuoperazion."
Oradechël uel l’Euregio ntenscifiché i raporc cun l Chemun de Mantua: l ie preudù n majer anuzamënt dla Lerch Andreas Hofer, per tré te deplù la jënt de Mantua y chiche va a vijité l’Euregio, y fé a na maniera che la sibe plu vijibla.
gst/dl
