Delegaziun ladina vá a ti ciaré n proiet cultural inovatif ti Grijuns
Sinergia y barat cun la Lia Rumantscha, la lia tët de dötes les assoziaziuns linguistiches rumances, a Coira y inauguraziun dla Tor Blancia - Tor Alva a Mulegns
COIRA (USP). Dai 20 ai 22 de ma é na delegaziun dl'Intendënza y Cultura ladina jüda a vijité le raiun linguistich rumanc ti Grijiuns olache al é dantadöt gnü ciaré da rajoné y da ciafé prospetives deboriada.
La delegaziun dl Südtirol á incunté a Coira rapresentantes y rapresentanc dla Lia Rumantscha por baié dles desfidades dl svilup linguistich y dla standardisaziun. Al é gnü tut en conscidraziun sinergies y scomenciadies che podess gní inviades ia deboriada tl dagní. Sot ala direziun dl presidënt Markus Solinger coliëia la Lia Rumantscha te na rëi proiec che promöi le lingaz y la cultura rumancia a livel regional, suraregional y ince sura le raiun linguistich fora.
"Le barat cun nüsc partners di Grijiuns é de gran importanza por la diversité linguistica tl raiun alpin, mo sambëgn ince por le svilup de proiec concrec che an podess mëte a jí deboriada. Al é bel da odëi cun ci gran impëgn che al vëgn lauré ti Grijiuns al dagní dl lingaz rumanc. I podun imparé un dal ater y crësce deboriada", á alzé fora le vizepresidënt dla Provinzia y assessur por la Formaziun y Cultura ladina Daniel Alfreider.
Dedô á la delegaziun tut pert al'inauguraziun dla Tor Blancia - la Tor Alva a Mulegns. "Rodunt da baié cun la Lia Rumantscha unse capí tan de paraleles strotorales y de contignü che al é danter nüsc raiuns linguistics y ci gran potenzial che i un danman por jí trus deboriada" á splighé André Comploi, le diretur por l’Istruziun, la Formaziun y la Cultura ladina. "De chësc vers é la vijiita ala Tor Blancia stada de ispiraziun particolara: la Nova Fundaziun Origen, ideadëssa de chësc proiet vijionar, desmostra te na manira demorvëia sciöche ara vá da ti dé vita nöia a raiuns culturai y linguistics cun creativité y coraje d'inovaziun. An s'á bele fat les prömes idees por na colaboraziun tl dagní."
Cun sü 30 metri de altëza é la Tor Alva a Mulegns la costruziun plü alta dl monn realisada daldöt cun la prozedöra de stampa 3D de petun y ara öga ince sciöche post por manifestaziuns culturales. "Le proiet simbolisëia le coliamënt danter tradiziun - sciöche l'ert dla conditoria storica dla regiun - y tecnologia plü moderna. Al é ince n ejëmpl de sciöche l'inovaziun tecnica pois porté pro a renforzé na valada ladina" spliga le diretur dla Repartiziun Aministraziun dla scora y cultura ladina Mathias Stuflesser.
L'incuntada é stada la basa por na cooperaziun plü sota.
red
