Mostra de cuntlujion dl Lizeum d’Ert prejënta duta la richëza criativa
La tlasses de cuntlujion dl Lizeum d’Ert Cademia gëura si mostra “Hybrid” cun opres dla sezions ert, grafica y design ai 20 de mei tla sala Luis-Trenker a Urtijëi
URTIJEI (USP). N merdi, ai 20 de mei, dala 16:00 à la sculées y i sculeies dla cuinta tlas dl Lizeum d’Ert Cademia de Urtijëi nvià ala giaurida dla mostra “Hybrid” tla sala Luis Trenker. Mustrà vëniel na cerduda de lëures de cuntlujion de duta la trëi sezions dla scola: ert figurativa, grafica y design.
La mostra “Hybrid” tematisea na varietà de criatures, obiec, monc y vijions defrëntes – na cunfruntazion artistica che la cuinta tlasses à realisà te truepa manieres. Tulan ite na lingia de elemënc iel unì a se l dé ideies nueves, nterpretazions y criazions. Danter la opres metudes ora iel pec de mubilia, fotografies, scultures y d’autra formes espressives che spidlea la richëza criativa dla sculées y di sculeies.
“La mostra nes lascia udëi a maniera scialdi tuchënta coche la jëunes y i jëuni ie boni de cunlië si ravises cultureles cun la formes d’esprescion da ncueicundì. Chësc deberieda criatif mët a lum simbolicamënter tan davierta, deferenzieda y cualitativamënter auta che la cuntreda furmativa ladina ie”, sotrissea l vizepresidënt dla Provinzia y assessëur per la Istruzion y Cultura ladina, Daniel Alfreider.
“’Hybrid’ ne mostra nia mé l talënt y l mpëni de nosta sculées y de nosc sculeies ma nce si capazità de crië liams defrënc danter tecniches, tematiches y formes d’esprescion d’uni sort. La mostra resprejentea la gran cualità de furmazion tla Scola Cademia, che possa mustré su na tradizion scialdi longia, y la mpurtanza zentrela dl’ert te nosc sistem de furmazion“, dij André Comploi, diretëur per l’Istruzion, la Furmazion y la Cultura ladina.
La mostra ie davierta dai 20 ai 26 de mei, da n lunesc a n vënerdì dala 16:00 ala 19:00 y n sada y dumënia dala 10:00 ala 12:00.
red
