Döta la mobilité dl Südtirol a 250 euro cun Südtirolmubilté Fix365
Prisc nü, inom nü, design nü: l'abonamënt por le trasport publich á n prisc bunmarcé. Alfreider: “Nosc obietif é chël da adoré le trasport publich te na manira saurida y conveniënta por düc".
BOLZAN (USP). Da jügn inant sarál a desposiziun le Südtirolmubilté Fix365, l’abonamënt anual a prisc fiss de 250 euro, preodü por les porsones che se sposta cun na gran frecuënza cun i mesi publics locai. Lapró gnarál inauguré n portal nü di anuzadus por podëi cumpré y manajé digitalmënter i abonamënc.
Le Südtirol Pass se trasformëia: nia ma tl design nü, mo dantadöt ti prisc nüs ponsá por respogne ales esigënzes dles nuzadësses y di nuzadus, y adatá ales categories de porsones desvalies che tol i mesi dla rëi de trasport publich tl Südtirol. “Le fin é chël da invié a tó i mesi publics te na manira scëmpla, comota y conveniënta por düc, por dötes les generaziuns y dodí di bojëgns de vignun, cun de bunes ofertes pori pendolars, les families y i jogn”, sotrissëia l’assessur provinzial ala Mobilité, Daniel Alfreider.
Ince la direturia dl Zënter por la sconanza di Consumadus, Gunde Bauhofer, dij la süa en cunt dl abonamënt nü a prisc fis: "Le abonamënt nü a prisc fis cür na locia tl'oferta atuala di abonamëc tl Südtirol. Chësta proposta nöia che convëgn por chi che roda dër gonot rapresentëia na sbürla implü por l’adoranza de corieres y ferates. Mo dantadöt, pó n abonamërapresent y cun n prisc plü tler daidé da tó le trasport publich te na manira plü scëmpla. Al é propi chësc che les anuzadësses y i anuzadus se aspetâ dal trasport publich, y porchël tolunse sö cun plajëi chësta novité ".
Numeri che vá söpert
Tl 2024 él gnü registré passa 50 miliuns de convalidaziuns cun i abonamenc desvalies de Südtirol Pass, na mesaria de incër 130.000 convalidaziuns al de, y de chisc ince 6,2 miliuns realisades cun le Südtirol Guest Pass.
N segnal tler dla crëta che crësc da pert dles zitadines y di zitadins, dles turistes y di turisc, tl sistem de trasport publich local, desmostré ince dai investimënc costanc por le svilup dla rëi y dles infrastrotöres, dij Joachim Dejaco, diretur general de STA - Strotöres Trasport Süütirol SpA.
N ingrandimënt dla rëi ponsada por mioré l’oferta y l'azessibilité dl trasport publich, por smendrí i tëmps d'aspeta sides tles gran zités co ti pici comuns.
Sparagn garantí
L’adoranza dl trasport publich pormët da smendrí i cosc liá ala mobilité privata, sciöche benzin, daz, manutenziun y assiguraziun, che pësa dassënn sön i cosc dla mobilité individuala.
Dötes les informaziuns
Le sistm nü sará a desposiziun da jügn 2025 inant. Por detais, modalité da cumpré y confrunc danter les tarifes desvalies: pass.suedtirolmobil.info.
gm/pir
