Scola prufesciunela provinziela Cademia mët n mostra si lëures
La Scola prufesciunela provinziela per l artejanat artistich Cademia a Urtijëi nvieia ala giaurida de si mostra anuela n mierculdì, ai 14 de mei 2025, dala 12:00 tla “Lia Mostra d’Ert”
URTIJEI (USP). Mustrà vëniel lëures dai ciamps dl ziplé, dla pitura decorativa, dl dessëni a man liede y dl mudelé. Da udëi iel oradechël lëures digitei dla materia de nseniamënt “Aplicazions y media nueves“ coche nce opres dl curs de spezialisazion “scultura”. L fin de chësta prejentazion ie chël de lascé udëi cie che vën pità tla ufierta de furmazion y de mustré l fortl artejanel y artistich dla sculées y di sculeies.
“La mostra dla scola prufesciunela provinziela Cademia, che vën metuda a jì uni ann, nes mostra tan bën che la furmazion pratica, la criatività y l urientamënt prufesciunel va a una tl sistem de scola ladin. Canche la jëunes y i jëuni possa nstësc crië cosses vivan si rujeneda y cultura, ie chësc n vere ejëmpl d’autonomia vivuda y n nvestimënt mpurtant tl daunì de nëus duc“, dij l vizepresidënt y assessëur per la istruzion y la cultura ladina Daniel Alfreider.
Tl zënter dla mostra ie chëst ann l tema Mond dl’eghes. La reprejentazion dla vedrina, na onda dl mer stiliseda, ie unida cunzepida deberieda cun la studëntes y i studënc. Realiseda iela unida da doi sculées dla tlas de cuntlujion, che à ala fin nce sëurantëut la coordinazion dl proiet – dala planificazion dl lëur y la comunicazion nchin ala realisazion.
“L tema Mond dl’eghes y la mostra nstëssa ie n bel ejëmpl de coche l’ert y l manejamënt di proiec possa unì cunliei. De tel scumenciadives ti pieta ala sculées y ai sculeies esperienzes mpurtantes per si svilup prufesciunel y persunel. Mi rengraziamënt ti va a duta la nseniantes y a duc i nsenianc y ala dirigënza dla Scola prufesciunela provinziela Cademia, che à fat a na moda che chësc proiet de gran ispirazion à pudù unì a se l dé y che, speron, descëide l nteres de truepa d’autra jëunes y de truep d’autri jëuni per chësta ufierta de furmazion unica”, sotrissea l diretëur per l’istruzion y la cultura ladina André Comploi.
La mostra ie davierta dai 15 nchin ai 30 de mei dala 10 ala 12 y dala 16 ala 19.
red
