Incuntada por garantí les ciases di pici tla Val Badia
L’Assessuria Pamer y l’assessur Alfreider s’á incunté cun i rapresentanc di Comuns de Badia, Corvara, Mareo, San Martin de Tor y La Val. Ciafé deboriada na soluziun a bëgn dles families
BALSAN/VAL BADIA (USP). L’assessuria provinziala ales Families, Rosmarie Pamer, y l’assessur provinzial ala Formaziun y Cultura ladina, Daniel Alfreider, s’á da püch incunté cun i rapresentanc di comuns de Badia, Corvara, San Martin de Tor, Mareo y La Val, y ince cun i responsabli dla cooperativa "Casa Bimbo" por baié sura les garanzies dl’assistënza ala pröma infanzia tla Val Badia. Presënc al’incuntada ê ince i dui direturs de departimënt Michela Morandini y André Comploi, la direturia dl’Agentöra por la Familia Carmen Plaseller y Patrick Psenner, diretur di Sorvisc soziai dla Val de Puster.
"I comuns dla Val Badia á ti ultims agn dé n impuls sterch al svilup dl sorvisc dles ciases di pici, realisan ince strotöres nöies", á sotrissé l’assessuria Pamer. "Porimpó - alza fora la cooperativa 'Casa Bimbo' che manajëia les ciases di pici tla valada - él tres de majeres dificoltés da ciafé y da tigní inant le personal, cossa che complichëia tröp la gestiun dles strotöres. Implü n’él nia ciamó gnü ciafé na organisaziun che pois manajé la ciasa di pici impormó fata sö a La Val." Tratan l’incuntada á i rapresentanc di comuns interessá ilustré la situaziun atuala sön so teritore y metü sön mësa les desfides dl dagní. "I un baié de soluziuns poscibles, che i messarun sëgn analisé plü da dlungia", é sté le ressomé dl’assessuria Pamer. "Al é fondamental che düc laora tla medema direziun y che an ciafes na soluziun tl interes dles families."
Ince l’assessur Alfreider á orü sotrissé chësc conzet, injuntan: "I rengraziëii por chësc confrunt, deache avisa tles valades ladines é l’organisaziun di sorvisc por la pröma infanzia fondamentala, y al momënt é les desfides bindebó granes". Bele ti proscims dis gnarál tigní na secunda incuntada por aprofondí les soluziuns che an spera da ciafé. "Nosc obietif é che vigni comun pois pité ciases di pici bun manajades, por che nüsc mituns y nostes mitans sides te de bones mans", á stlüt jö l’assessuria Pamer.
red
