Formaziun sura i confins fora
Vijita a Coira de scolares y scolars ladins dles Scores altes La Ila
COIRA/BALSAN (USP). Do la vijita dl grup de scolares y scolars grijuns dla Scola chantunala grischuna da d‘aisciöda dl 2024 a La Ila, él gnü a s’al dé dai 7 ai 9 de ma 2025 le iade de revers da pert de 34 scolares y scolars dla Val Badia a Coira, por imparé da conësce la realté linguistica y culturala di vijins grijuns.
Le proiet de barat danter les döes scores é a sostëgn dla incuntada danter mendranzes de lingaz. Al dess ti porté pormez ai jogn y ales jones le plurilinguism, le dialogh y l’ester daverc y davertes sura i confins geografics y linguistics fora.
A contat cun la realté di Grijuns
I jogn y les jones dles secundes y terzes classes dl Lizeum des Sciënzes umanes y dl Lizeum Linguistich, sciöche ince dla terza classa dl Istitut Tecnich Economich á podü tó pert a n program desvalí. N elemënt zentral é sté n labor tla Scola chantunala grischuna, olache al é gnü lauré fora n toch teatral te dui lingac. Lapró êl söl program escurjiuns culturales, sciöche la vijita dl Kloster St. Johann tl Müstair, na roda dla cité de Coira y na odlada iadô les culisses dala Radiotelevisiun Svizra Rumantscha (RTR).
Le proiet é gnü organisé dal Ciamp pedagogich dla Direziun provinziala Scolines y scores ladines cun le coordinamënt de Magdalena Lerchegger y cun le sostëgn ai contignüs da pert dla prof.a Magdalena Miribung (Scores Altes) y dl prof. Corsin Caglia (Scola chantunala grischuna).
"Chësc proiet ne renforzëia nia ma la competënza linguistica y la cosciënza dla identité culturala, mo dá ince n contribut da se daurí ala pluralité, ala toleranza y da sté adöm tl respet", sotrissëia le Vizepresidënt dla Provinzia autonoma da Balsan y Assessur por la Scora y Cultura ladina Daniel Alfreider. "Avisa le barat danter mendranzes linguistiches desmostra tan de importanza che al é n plurinlinguism ví tl’Europa, sciöche al vëgn lauré por la promoziun de na comprenjiun danter realtés desvalies y sciöche al pó gní porté inant deboriada na identité europeica."
Ince l’Intendënt ladin Heinrich Videsott, che á acompagné le grup de scolares y scolars, sotrissëia: "L’obietif de chësc barat danter les classes é chël da imparé da conësce la realté linguistica de nüsc vijins y da imparé da comuniché cun jogn y jones che vëgn da d’atri paisc. De te’iniziatives dá n contribut important al svilup dla personalité di jogn y dles jones."
Söl iade da gní zoruch s’á le grup ciamó archité a Glurns y a ti ciaré ala Churburg.
red
