Bandida de concurs por posiziun de Diretur dl Istitut Cultural Ladin
Provinzia Autonoma de Balsan publichëia la bandida de concurs por la posiziun de Diretur dl Istitut Cultural Ladin Micurá de Rü - Domanda de amisciun al concurs anter i 3 de jügn 2025
BALSAN (USP). La Provinzia Autonoma de Balsan publichëia la bandida de concurs por la posiziun de Diretur dl Istitut Cultural Ladin Micurá de Rü, na istituziun zentrala por le lingaz, la cultura y l’identité ladina. Chësta bandida é adressada en particolar ai candidac y ales candidates che fej pert dl grup linguistich ladin, chi che fej fora l’elemënt cultural y l’identité di ladins tl Südtirol.
La domanda de amisciun al concurs mëss gní dada jö anter y nia do i 3 de jügn 2025, dales 12.00, tres la plata ofiziala dla Provinzia Autonoma de Balsan. Les candidatöres pó ma gní menades online tres la plata internet dla Provinzia. Implü él debojëgn da presenté eletronicamënter na detlaraziun de portignënza al grup linguistich ladin.
"L'Istitut Cultural Ladin Micurá de Rü á n rode zentral tla salvaverda y tla promoziun de nosc lingaz y de nosta cultura, en particolar dl'identité dles comunités ladines de Gherdëna y dla Val Badia, mo ince tla colaboraziun cun les atres valades ladines sciöche Fodom, Ampëz y Val de Fascia", dij l’Assessor ala Formaziun y Cultura ladina Daniel Alfreider. "Cun chësta publicaziun dla bandida orunse s’assiguré che la direziun dl'istituziun passes te mans competëntes. I oress ince alzé fora che la posiziun é al momënt curida a interim cun gran impëgn da Jürgen Runggaldier, Diretur dl Ofize por la Cultura y la Jonëza Ladina. Chësta posiziun profescionala é de gran valüta por garantí ince tl dagní la sconanza a nosc lingaz y a nosta identité culturala ladina."
"I speri che tröc candidac interessà y adatà toles pert al concurs – tla Ladinia ne nes mancel dessigü nia porsones competëntes", nsciö le Diretur dl’Intendënza y Cultura Ladina André Comploi: "Cun la direturia nöia o le diretur nü dess spo mëte man n capitul nü por l’Istitut Ladin ‘Micurá de Rü’: so compit ne sará nia ma da aministré l’istituziun con sües colaboradësses y colaboradus, mo da la arvëne y ti dé n orientamënt cun na vijiun tlera por le dagní se basan sön söa funziun sciöche zënter de competënza dl Ladin y colaboran cun les atres realtés scientifiches y culturales."
I candidac interessá pó consulté la bandida completa, i formulars che vá debojëgn y deplü informaziuns söl sit ofizial dla Provinzia Autonoma de Balsan, tla seziun Cuncorsc y bandides por dirigënc.
Test dl comunicat de Cuncors
Iscrizion al Cuncors
Detlarazion de purtenienza ala grupa linguistica ladina
Por informaziuns: ofize Organisaziun: tel. 0471 414950; E-Mail: organizzazione@provincia.bz.it
red
