Veles de Chemun: sëurantò respunsabltà per la cumenanza
L presidënta Kompatscher se cungratulea pra dutes y duc che ie ruvedes/ei ite te Chemun y rengrazia chiche zapa ora, per si mpëni desmustrà ti ani passei
BULSAN (USP). L presidënt dla Jonta provinziela Arno Kompatscher se cungratulea pra duta y la amboltes y duc i ambolc permò litedes/ei y pra i/la cunselieres litei/edes y rengrazia tl memdemo mumënt chiche zapa ora per si mpëni desmustrà ti ani passei
La veles de Chemun à mustrà su te truep chemuns dla provinzia de Bulsan n bon balanz danter cuntinuità y inuvazion,” dij l presidënt Kompatscher. “Dutes y duc che à fat pea pra la veles, se sëurantulan respunsabltà, se merita respet. Ajache l ne n’ie zeche de normal se mëter a despusizion ani alalongia per l servisc per la cumenanza – cun gran mpëni persunel, cun crëta y cun l savëi che la va nce for de tenì ora critiches.”
Cun na udleda ala ndesfidedes nueves sotrissea Kompatscher l gran valor de na cunlaurazion costrutiva danter Provinzia y Chemuns: “I Chemuns ie l fil dl spinel de nosta Provinzia. I ie daujin dala jënt, cunësc si bujëns y porta ite si pruspetives tla dezijions politiches. Perchël ie nosc travert chël de jì inant sun l troi deberieda, davierc, njeniei al dialogh y tla crëta un cun l’autra.”
L presidënt dla Jonta provinziela rengrazia oradechël duta la/i amboltes/c y cunselieres de Chemun che à l mandat che toma: “I/les à ani alalongia fat pea, sëurantëut respunsabltà y dat l miec per l svilup de si Chemun. A d’ëi/ëiles ti va nosc recunescimënt y rengraziamënt de cuer!”
Ala fin ti mbincia Kompatscher ala/ai reprejentantes/c nueves de Chemun n bon start: “Ie me ncunforte sun na bona cunlaurazion – tl pensier y tla finamira de nosta cumenanza per n Südtirol sterch y ulache l se merita de y l ie bel a viver.”
I resultac dla veles de Chemun ie da abiné tla plata internet Listen und Kandidaten / Gemeindewahlen 2025 – Südtirol.
red
