“Chiche uel ti dé si cuntribut alla cossa, va a lité”
Ai 4 de mei iel la veles de Chemun. Kompatscher nvieia duc chëi y duta chëles che à la rejon de vela de jì a lité y sëurantò nscila si respunsabltà.
BULSAN (USP). N dumënia ai 4 de mei à la zitadines y i zitadins de Südtirol la chance dé fé pea per tò la dezijion per l daunì de si Chemuns. L presidënt dla Jonta provinziela de Bulsan Arno Kompatscher nvieia duc chiche à dërt de lita de se nuzé ativamënter de chësc mesun.
“Uni Chemun à si mus, si carater – y l viv dla jënt che se sëurantol la resunsabltà te Chemun dedite. Cun si usc pra la veles de Chemun fej la zitadines y i zitadins pea per tò la dezijion de chiche reprejenterà si cuestions y dëssa judé pea a menejé si mond y si vita,” dij Kompatscher.
Iusta te n tëmp cun truep mudamënc à i Chemuns na ncëria fundamentela: “Nosta amboltes y nosc ambolc y cunselieres de Chemun ie suvënz i prims che ti va permez ai zitadins y ala zitadines cun si cruzi, cun si ideies y cun chël che i se mbincia. Tan deplù iel mpurtant che chësta respunsabltà vënie metuda tla drëta mans – cun na vela fata cun cuscienza y cun la nfurmazions aldò.”
L presidënt Kompatscher dà da lecurdé che la democrazia ne n’ie nia zeche che ie y che resta per for: “La viv tla crëta y tl mpëni dla jënt. Jì a lité ie n sëni de crëta – tla democrazia, te nosta cumenanza, tl daunì deberieda.”
Kompatscher chërda nscila diretamënter la jënt a fé pea: “Jide a lité. Mustrëde che l Chemun ve sta a cuer. Dajëi pëis a vosta usc – per n deberieda tla solidarietà te nosta provinzia.”
De gra a duta la candidates y duc i candidac
L presidënt dla Jonta provinziela de Bulsan rengrazia duc chëi y chëles che ie jic sun lista y che se sëurantol respunsabltà. “L mpëni dla candidates y di candidac ie n cuntribut per nosta democrazia y per l svilup tresora de nosc Chemuns. Duc y dutes che fej pea se merita l respet y l recunescimënt per si mpëni.”
Sce pra la veles dl/a ambolt/a te chemuns de passa 15.000 abitanc ne arjonj pra la prima lita degun/a candidat/a la maiuranza assoluta, saràl na segonda vela o n balotaje, coche n dij. Iló uniràl lità danter i/la doi candidac/tes cun l plu ujes tla prima lita. L balotaje ie la segonda dumënia do l di dla prima vela . Sce l ie te n chemun mé una na lista, vel la lita mé sce almanco 40% de chiche à rejon de lita dà ju si stima y ulache dla ujes dates ju vélel almanco l 50%.
Info: https://www.gemeindewahlen.bz.it/lld/1/pre
red
