Scolines y scoles ladines: numer dla iscrizions stabil
L numer dla iscrizions ala scoles ladines resta stabil nce per l’ann de scola 2025/2026
BULSAN/BALSAN (USP). L numer dla iscrizions ala scoles ladines resta stabil nce per l’ann de scola 2025/2026: Per l proscimo ann de scola 2025/26 iel al mumënt scric ite ndut 2938 mutans y mutons (18 fauré 2025). Atualmënter, tl ann de scola 2024/25, fej 2923 mutans y mutons na scola ladina. “La scola ladina ie fata de pitla strutures, y l ie propi chësta particularità che ti permët a nosta sculées y nosc sculeies de giapé n sustëni individuel. L liam strënt cun nosta rujeneda dl’oma, nosta cultura y tradizions y l nseniamënt dl plurilinguism resta de gran valuta”, sotrissea l vizepresidënt y assessëur Daniel Alfreider.
192 iscrizions nueves ie unides a se l dé tla 17 scolines de Gherdëina y dla Val Badia, ndut ie l numer de mëndres y mëndri scric ite per l proscimo ann de scola 594 (permez a 601 iscrizions tl ann scolastich 2024/25).
Tla 15 scoles primeres dla valedes ladines iel ndut 1158 sculées y sculeies, cun 223 iscrizions nueves (208 fova la iscrizions tl ann de scola 2024/2025). Al mumënt iel 627 sculées y sculeies che va a scola tla 5 scoles mesanes dla valedes ladines, per l proscimo ann iel 244 iscrizions nueves che purterà l numer da 627 a 644.
Al mumënt iel ndut 486 jëunes y jëuni tla scoles autes ladines. Mplu furmea la scola prufescionela Cademia 24 jëunes y jëuni. Ndut iel 111 iscrizions nueves tla scoles autes, purtan l numer de sculées y sculeies da 510 a 542.
“Ntan che la iscrizions ala scolines ie caledes lesirmënter, ie la iscrizions tla scoles primeres y dantaldut tla mesanes jites suvier a na maniera tlera. Chësc renforza de plu nosc sistem scolastich ladin. La dumanda auta a nosta scoles mesanes desmostra che nosc sistem paritetich vën aprijà dala families”, dij l Diretëur dla Ntendënza per la Scoles Ladines, Heinrich Videsott. L vën registrà n arbassamënt tla scoles autes, che vën per esperienza inò trat ite n pert ntan la vacanzes d’instà y d’autonn.
red
