Ejam de ladin: i mëmbri dla comisciun é gnüs nominá
Ai 18 de forá, sön proposta dl assessur Daniel Alfreider, á la Junta provinziala nominé i mëmbri dla comisciun por l’aprovaziun dla conescënza dl lingaz ladin
BALSAN/BULSAN (USP) Por podëi insigné tles scores dles valades ladines vëgnel damané la conescënza dl lingaz talian, dl todësch y dl ladin. Sura le atestat de bilinguism, él da sostigní n ejam spezifich dan na comisciun nominada aposta, por garantí les competënzes tl lingaz y tla cultura ladina.
"La cualité dl insegnamënt tles scores ladines depënn, por na buna pert, dala preparaziun y dala cualificaziun di insegnanc. L’ejam de ladin rapresentëia n elemënt fondamental nia ma por garantí les competënzes linguistiches y culturales, mo ince por renforzé l’identité de nostes scores", á dit le vizepresidënt y assessur ala Formaziun y Cultura ladina, Daniel Alfreider.
Tla sentada di 18 de forá, sön proposta dl assessur Daniel Alfreider, á la Junta provinziala ofizialisé la nomina di mëmbri dla comisciun por l’aprovaziun dla conescënza dl lingaz ladin. Por i proscims cin’ agn é la comisciun metüda adöm dai mëmbri efetifs: Albert Videsott (presidënt), Romy Canins (secreteria), y da Sofia Stuflesser, Magdalena Miribung, Monika Senoner, Elena Frenademetz y Ivan Senoner. I mëmbri suplënc é Maria Kostner (vicepresidënta), Marion Perathoner (secreteria suplënta), Monica Moroder, Christian Ferdigg, Jürgen Runggaldier y David Lardschneider.
"L’ejam de ladin dla Direziun provinziala Scolines y Scores ladines rapresentëia n recuisit fondamental por l’inserimënt tles gradatöres dl sistem educatif ladin. A chësta manira vëgnel garantí la continuité y l’unicité dl percurs scolastich ladin", á sotrissé Heinrich Videsott, diretur provinzial dles Scolines y Scores ladines.
red
