La Direziun Intendënza y Cultura ladina á vijité les scores ladines
Le Diretur nü dl’Intendënza y Cultura ladina y le Diretur provinzial nü dles Scolines y dles Scores ladines vijité les set direziuns de scora y la direziun dles scolines dla Val Badia y de Gherdëna
BULSAN/BALSAN (USP). Chëst’edema (ai 11 de forá) y l’edema da denant (ai 4 de forá) á le Diretur nü dl’Intendënza y Cultura ladina, André Comploi, y le Diretur provinzial nü dles Scolines y dles Scores ladines, Heinrich Videsott, vijité les set direziuns de scora y la direziun dles scolines dla Val Badia y de Gherdëna.
"Sciöche Direziun dl sistem formatif y dla cultura ladina sunse responsabli dla planificaziun strategica y dla direziun dles scores, mo i sun ince al sorvisc de düc chi che é tuc ite tl setur dla formaziun y dla cultura ladina. Le contat personal é por me dër important, por colié nostes forzes, cherié sinergies y mëte impé na colaboraziun efiziënta" sotrissëia André Comploi, Diretur dl’Intendënza y Cultura, che á ince tut l’ocajiun da vijité d’atres istituziuns y realtés culturales.
Tl zënter dles vijites n’él nia ma sté le barat de contignüs didatics, cun temesc sciöche la digitalisaziun y la segurëza, la didatica integrada y l’inclujiun, mo ince i aspec aministratifs essenziai por le bun funzionamënt dles scores, sciöche i frabicac scolastics, le personal dozënt y chël aministratif di secreteriac.
"Le sistem scolastich ladin é le su sistem formatif plurilingual dla Provinzia Autonoma de Balsan, y propi por süa unizité ál debojëgn de na direziun autonoma, por manajé y porté adöm le funzionamënt dles chestiuns aministratives y di contignüs, y por podëi ti trasmëte ai scolars y ales scolares nia ma conescënzes, mo ince la componënta dla cultura y dla tradiziun ladines" á dit le Diretur provinzial dles Scolines y dles Scores ladines, Heinrich Videsott.
La direziun dles Scolines y dles Scores ladines tol ite: la direziun dla scolina “Ladinia” (601 mituns y mitans) sot la direziun de Genny Ploner, les 4 direziuns raionales de Urtijëi, y Sëlva, de La Ila y Al Plan de Mareo, sot la direziun de Monica Moroder, Ute Senoner, Claudia Canins Egger y Ludwig Rindler. Les direziuns raionales tol ite indöt 15 scores elementares (cun 1185 scolars y scolares) y 5 scores mesanes (cun 627 scolars y scolares). Te Gherdëna é Maria Teresa Mussner direturia dl lizeum artistich „Cademia“ y dla scora profescionala provinziala por l’artejanat artistich. Bernhard Flatscher é le diretur dl Istitut tecnich ecomonich „Raetia“. Direturia dles Scores altes da La Ila é Elena Pellegrini. Al momënt él 510 studënc y studëntes che frecuentëia les scores altes tles döes valades ladines.
"Respet ai grups linguistics todësch y talian, nos ladins sun na comunité picera mo impó rica de varieté. Nosta desfida é mantigní alt le livel dl‘istruziun y tl medemo momënt sconé y renforzé nosta identité ladina. N gran dilan ti vá a düc y dötes chi che se dá jö de chësc vers" nes á dit le vizepresidënt dla Provinzia y assessur ala Formaziun y cultura ladina, Daniel Alfreider, che confida te na bona colaboraziun danter les direziuns de scora y l’aministraziun zentrala.
red
