Eletrodot Laion-Corvara: ancuntedes per i zitadins y la zitadines

Ai 19 y ai 20 de jené prejënta TERNA l cunliamënt eletrich nuef danter i chemuns de Laion y Corvara. L’ancuntedes dedichedes ala populazion de chisc luesc unirà tenides online y scumëncia dala 17:00.

Tl 2025 finerà Terna l cunliamënt nuef de na linia duta sot a tiera danter la stazions eletriches di Chemuns de Laion y Corvara. Per prejenté l eletrodot nuef urganisea Terna doi evënc online per i zitadins y la zitadines di Chemuns nteressei dala realisazion. Chisc evënc ie prugramei ncuei mierculdì, ai 19 y duman n juebia, ai 20 de jené, respetivamënter dala 17:00 inant. I link y la istruzions ie a despusizion sun la plata web de Terna dedicheda al proiet (https://www.terna.it/it/progetti-territorio/progetti-incontri-territorio/laion-corvara). “L’ancunteda cun Terna” – tlarësc l assessëur provinziel per l ambient y l’energia Giuliano Vettorato – “reprejënta na ucajion de cunfront danter Terna y la zitadinanza nteresseda, che puderà cunëscer l proiet y si mpurtanza per nosc raion, ma nce tò pert diretamënter per damandé nfurmazions y tlarimënc. L eletrodot nuef Laion-Corvara cunfërma inò nosc mpëni cun Terna per miuré la rë dla lectrisc tl Südtirol y la fé plu resilienta.”

Mo n tapl per KlimaLand

La linia nueva d’auta tenscion, longia 23 chilometri, nteresserà i Chemuns de LaionUrtijëiCiastelSanta CrestinaSëlva Corvara. L eletrodot, che ti jirà n gran pert do ala linia dl stradon (SS242 y SS243), reprejentea n proiet mpurtant, sustenibl y inuvatif per l svilup dla nfrastrutura y dl’energia tl Südtirol. L se trata de n proiet tres chël che n puderà aumenté l’efizienza dl servisc eletrich y garantì la segurëza de refurnimënt, dantaldut ti zëntri turistics da d’inviern, ti raions dl Jëuf de Frea y dl’Alta Badia. Oradechël garantësc chësta nfrastrutura plu segurëza ai produtëures locai d’energia per pudëi mëter tla rë l’energia produjeda te chësta zona. La nfrastrutura arà na fazion de mënder dann sun la cuntreda y garantirà la segurëza energetica per la Olimpiades Milan-Cortina 2026.


Clican chiló röiun ala verjiun originala dl comunicat stampa por visualisé imajes, documënc o video che taca lapró

tl