Formaziun profescionala, löm vërda ai planns dl ann de scora 2022/23
La Junta provinziala á aprové incö i planns dla Formaziun profescionala todëscia, taliana y dla Scora profescionala por l’artejanat artistich Cademia a Urtijëi por l'ann de scora 2022/23.
Te Südtirol él de plü Zëntri de formaziun profescionala partis sö sön döt le teritore provinzial che se fistidiëia dla formaziun de basa (cualifica), dla formaziun post-cualifica y dla maturité profescionala tres la realisaziun de cursc che tol ite de plü seturs. La Junta á aprové sön proposta di assessurs Daniel Alfreider, Philipp Achammer y Giuliano Vettorato incö ai 21 de dezëmber i Planns de formaziun por l'ann de scora 2022/23 por i seturs de formaziun profescionala taliana y todëscia y por la Scora profescionala por l’artejanat artistich Cademia a Urtijëi. Al se trata dl passaje contlusif do la valutaziun positiva da pert dla Comisciun por la formaziun profescionala.
L’assessur por la scora y cultura ladina Daniel Alfreider sotlignëia che “por ci che reverda l’oferta scolastica ladina é la formaziun profescionala n’opziun ajuntiva por ti garantí ales scolares y ai scolars dles valades ladines na gran varieté de poscibilités de formaziun por so percurs profescional”. L’assessur por la scora todëscia Philipp Achammer alza fora le bun inom dla formaziun profescionala te döt le Südtirol, ince sce tl tëmp de pandemia él ste ri da organisé leziuns y practicums. “I orun inant garantí le livel alt dla formaziun profescionala por ti pité ala jonëza oportunités de svilup desvalies”, insciö Achammer. Ince l’assessur por las scora taliana Giuliano Vettorato recorda che les ofertes formatives á süa fondamënta sön les profesciuns prinzipales presëntes tl Südtirol tres na buna colaboraziun cun impreses y istituziuns publiches y privates te döta la Provinzia.
Le diretur dla formaziun todëscia Gustav Tschenett sotlignëia che “do n ann de scora cun dificoltés liades ala pandemia él les scores profescionales y tecniches che á indô cherié n’oferta de formaziun ampla, inovativa y orientada tl vers dles nezescités por le ann de scora 2022/23”.
Clican chiló röiun ala verjiun originala dl comunicat stampa por visualisé imajes, documënc o video che taca lapró
jw/tl
