Proiec de recostruziun tl Nepal: dala Junta 200.000 euro implü
La Junta provinziala á tut la dezijiun da mët a desposiziun 200mile euro implü por le sostëgn de proiec cun aiüc de prescia y de recostruziun tl Nepal. I fonds nüs sará assegná tres na bandida ales assoziaziuns y organisaziuns cun süa sënta legala o operativa tl Südtirol y che é atives tl setur dla cooperaziun. I proiec mëss gní presentá cina ai 18 d’agost.
Sön la basa dla cooperaziun plurianuala danter les organisaziuns dl Südtirol y dl Nepal á la Junta metü a desposiziun fonds nüs che gnará partis sö tres na bandida de concurs por assoziaziuns y ënc cun la sënta legala o operativa tl Südtirol y che laora tl setur dles cooperaziuns. La priorité plü alta ti gnará dada ai proiec che reverda la recostruziun de frabicac publics (scores, frabicac de anuzamënt publich, zëntri dla sanité, yii.), la metüda a desposiziun de materiai por la costruziun y la recostruziun de abitaziuns, la costruziun de n sistem idrich, l’ampliamënt dl sostëgn sanitar y psicosozial y mosöres de prevenziun cuntra desgrazies futures.
La presentaziun di proiec mëss gní dada jö ala Repartiziun Presidënza y relaziuns cun l’ester dla Provinzia, Ofize Chestiuns de cabinet cina ai 18 de agost dl 2015. I formulars pó gní desciariá sot ala misciun: www.provincia.bz.it/cooperazioneallosviluppo. Informaziuns plü monüdes pón ciafé tres l’Ofize Chestiuns de cabinet, tel. 0471/412130, e-mail gabinetto@provincia.bz.it.
rc
