Theodor Rifesser sarà l cumisser dl Chemun de Urtijëi
La Jonta provinziela à numinà Theodor Rifesser cumisser dl Chemun de Urtijëi. Rifesser, ex diretëur dl Istitut pedagogich ladin y respunsabl dl Departimënt ladin dla Facultà de Scienzes dla furmazion dla ULB (Università Liedia de Bulsan), menerà l’aministrazion urdenera a Urtijëi nchin che l unirà tenì la lites nueves.
Per l fat che l ne ie nia unit arjont l quorum dl 50% plu una dla stimes valëivles, che fova de bujën pervia che l se à mé presentà una na lista y n sëul candidat ambolt, ie la veles cumeneles a Urtijëi de n dumënia, 10 de mei, nules.
L ie perchël de bujën de numiné n cumisser per l’aministrazion normala dl Chemun te Gherdëina nchin ala veles che vën.
La Jonta provinziela à cris ora l cumisser tla persona de Theodor Rifesser. Rifesser, che ie nasciù a Urtijëi tl 1947, ie stat l diretëur dl Istitut pedagogich ladin nchin che l ie jit n pension tl 2011. Rifesser ie nce cumëmber dl Cunsëi dla Università Liedia de Bulsan y coordinadëur dl departimënt ladin tla Facultà de Scienzes dla Furmazion a Persenon.
La veles nueves a Urtijëi unirà bonamënter fates danter l nuvëmber y dezëmber che vën.
USP
