Scora / Cultura | 15.09.2014 | 18:06

Revijiun dl sostëgn por i editurs: „Fontanes importantes por la cultura“

La promoziun di editurs gnarà laorada fora danü y adatada a chëra dla Regiun: chësta dezijiun é gnüda portada dant incö (15/09) dal Presidënt Arno Kompatscher, dai assessurs provinziai Philipp Achammer y Christian Tommasini tratan n’incuntada cun i rapresentanć di editurs. „Insciö orunse sostignì le contribut important che i editurs dà inant sciöche fontanes de cultura“, insciö Kompatscher.

Na delegaziun de rapresentanć dl monn di editurs tl Südtirol, danter l’ater cun Hermann Gummerer, presidënt dl grup di editurs pro l’Uniun Comerz Turism Sorvisc („ Handels- und Dienstleistungsverband Südtirol“ hds) à debatü incö adöm cun trëi mëmbri dla Junta provinziala sön le sostëgn y la promoziun dl setur di editurs tl Südtirol. „I sun stà düc a öna che i editurs – insciö le Presidënt Kompatscher - ne é nia ma fontanes importanes por la promoziun dla cultura, mo che ai porta inće a n svilup economich y cultural tla Provinzia.“

Por ći che reverda la promoziun di editurs gnaràl laurè te döes direziuns: „Da öna na pert gnaràl svilupé ti proscimi mëisc na reforma dla lege sön la cultura, olache al gnarà porvè da inserì la poscibilité da promöie te na manira dirëta i editurs“, à dit incö Kompatscher. „Chësc oress dì che al ne foss nia ma poscibl, sciöche ćina śëgn, da sostignì operes singules, mo insciö essun inće la poscibilité da promöie programs anuai che à na valüta culturala“, sotlignëia l’assessur por la cultura Philipp Achammer.

„Te chësc percurs – insciö l’assessur Christian Tommasini – él important da stabilì critêrs che garantësces efetivamënter la cualitè di programs inće por evité n aprovaziun de contribuć zënza limitaziuns.“ Por ći che reverda la realisaziun dla lege nöia él preodü che ara vëgnes aprovada ti pröms sis mëisc dl 2015. „Daldô messaràl spo gnì stabilì i critêrs por la destribuziun di contribuć inće en acordanza cun les diretives dades dant dal’Uniun Europeica“, insciö Achammer.

La secunda forma de politica de sostëgn ai editurs reverda na revijiun ti proscimi mëis dles leges de promoziun dla cultura dla Regiun da öna na pert y dla Provinzia dal’atra pert. „L’obietif é chël da evité regolamentaziuns doples y da garantì insciö na maiù tlarëza por ći che reverda döt le sistem“, stlüj jö le Presidënt Kompatscher.

rc

Galaria dales fotografies