Scora / Cultura | 13.10.2010 | 08:53

L Cunsëi dl Istitut Ladin à lità Albert Videsott

USP – Se ti senteda costituënta à l cunsëi nuef dl Istitut Culturel Ladin, n sëira (12 utober) lità Albert Videsott presidënt nuef. Si ubietif persunel ie de cuntribuì ala legrëza per la cultura y rujeneda ladina. „Per la Jonta Provinziela à l Istitut Micurà de Rü la cumpetënza per cuestions de rujeneda“ à l assessëur Florian Mussner sotrissà te chësta ucajion.

L cunsëi nuef de Istitut à scumencià si lëur dajan duc a una la crëta per la ncëria da presidënt a Albert Videsott da S. Martin. „Lauré per la cultura muessa fé legrëza, scenó ne vala nia. Ie pei do chësta ncëria cun legrëza“ nsci ie stata la prima reazion de Videsott, juntan che l Istitut ie na seva dla cultura ladina perchël iel per ël n unëur y na legrëza a vester presidënt. Sun ot cunselieres prejënc à set dat la stima al diretëur dla scoles autes de La Ila, una zedula ie resteda blancia. Cun l medem resultat ie Bruno Senoner de S. Crestina, diretëur dl ITC a Urtijëi, unì lità vizepresidënt.

La senteda costituënta ie unida cherdeda ite dal assessëur ladin Florian Mussner che te si ntroduzion al cunsëi nuef à recunesciù l lëur dl Istitut ti ultimi trënt ani nunzian nrescides y publicazions n referimënt ai vocabuleres. „Nosta populazion à te chësc tëmp mustrà plu sensibltà per la rujeneda ladina y rejona nce de plu ladin. Fossa pa chësc unì a se l dé zënza Istitut?“ nsci la reflescion purteda dant da Mussner. L assessëur ova nce nvià l presidënt da dant Hugo Valentin per rengrazië y uneré si lëur de 30 ani. L Istitut Ladin ie l’istituzion de referimënt dal Jonta provinziela per cuestions de rujeneda: „L ladin à n daunì, on la strutures, la se trata sce nëus son boni de les fé viver y de les adurvé“. Per l daunì se damanda l assessëur ladin de miuré la culaburazion cun l’autra istituzions sciche l Istitut Pedagogich, la Ntendënza, l Museum Ladin y la repartizion ladina dl’Università. „L dëssa vester na culaburazion te chëla che l Istitut Ladin dà sustëni al’autra istituzions ma dëssa nce giapé sustëni“ à dit Mussner.

L ann 1974 ova la „Arbeitsgemeinschaft Tirol“ scumencià a rujené de n Istitut Ladin, de setëmber dl 1977 ova pona bele scumencià l’atività. Chësc tëmp da record desmostra la gran ulentà che n ova abù a mëter su l Istitut debota y fat bën. Chësc spirt à l assessëur ladin mbincià al cunsëi nuef per si ncëria nchin tl 2015.