Aministraziun | 23.04.2010 | 10:29

Gran nteres per l servisc ai media de rujeneda ladina

USP – Avisa ncuei (23 auril) da n ann ova l Ufize stampa dla Provinzia de Bulsan mudernisà si plata internet tla rujeneda ladina. La cumpëides de tanc che se à nuzà dla plata internet cun i comunicac, fotos, ntervistes audio y video desmostra gran nteres per l servisc de nfurmazion tla rujeneda ladina.

Sota l’adres www.provinzia.bz.it/uspl possen udëi la comunicazion da pert l Guviern provinziel y di servijes dla Provinzia de Bulsan che vën fata per ladin te forma de comunicac stampa cun fotos, video y ntervistes a usc. Te chësc ultimo ann, da canche la plata internet dl Ufize stampa fova unida muderniseda nce per ladin, iel unì cumpedà 33.969 vijitadëures. „L aumënt de passa 20% di vijitadëures do l prim ann desmostra che l servisc de nfurmazion tla rujeneda ladina vën priejà dassënn.“ à dit l assessëur ladin Florian Mussner, juntan che la zifres muessa sambën unì ududes n relazion ala cumpëida dal populazion ladina. La plata internet ladina dl Ufize stampa à ntan i prim mënsc dl 2010 abù mo n majer aumënt de vijitadëures. Danter jené y merz iel unì cumpedà 11.484 vijitadëures che fej ora n aumënt de 66,1% permez ai medemi mënsc dl ann dant.

La pert zentrela dla plata internet per ladin dl Ufize stampa ie i comunicac cun fotografies. Truep nteres iel nce unì mustrà per i video y ntervistes a usc per ladin. “Pudëi udëi y audì la nutizies tla rujeneda ladina ie na maniera de comunicazion che tën l var di tëmps” sorissea l assessëur provinziel ladin. Sun la plata internet possa uni un fé l abunamënt debant ala nutizies tres e-mail y ala zaita provinziela.

L servisc dl Ufize stampa tla rujeneda ladina ie trëi iedesc de utl: per la redazions, per duc i nteressei y per la rujeneda. I comunicac vën mandei ora a duc i media de rujeneda ladina y tl medemo tëmp possa duc i nteressei liejer do la nuviteies per ladin tl internet.

“Scrì de cuestions aministratives per ladin ne ie nia for tan scëmpl y chësc servisc desmostra che n possa se nuzé de nosta rujeneda nce te chisc caji. Per la cura dla rujeneda iel dessegur n cuntribut mpurtant” spiega l assessëur ladin Florian Mussner.
L Guviern provinziel y l’aministrazion publica dà inant la nfurmazions sun si atività tres l Ufize stampa y si lëur ie a chësta maniera nce trasparënt. La comunicazion ala stampa cuer nsci l duvier de nfurmé y ie tl medemo tëmp nce n servisc per la populazion.

as

Galaria dales fotografies