Politica | 19.06.2008 | 14:08

Durnwalder a Bruxelles: aleanza danter regions per aministré la montes

USP – L presidënt dla provinzia Durnwalder à fat udëi ite a passa 300 reprejentanc dla regions dla Comunità Europea che se à abinà tl parlamënt a Bruxelles dla maniera de aministré la montes. L cumité dla regions dla Union Euorpea à ncuei (19 de juni) dat pro l proiet sun l daunì di raions da mont tl’Europa. “É purtà dant a inuem dla regions n pachetl de pruvedimënc y é damandà ala Cumiscion europea de nvië via na politica spezifica per la montes”, à dit Durnwalder. Ala discuscion sun chësc argumënt à nce tëut pert l cumissèr dla UE ala regions Danuta Hübner.

L proiet de prupostes prejentà ncuei da Durnwalder tl parlamënt a Bruxelles ie unì dat pro cun duc a una. L se damanda la publicazion de n liber vërt sun la desposizions politiches per straverde y svilupé la montes tla Union europea. “L ie n var de gra mpurtanza de viers de na politica europea dla montes” à detlarà Durnwalder. L presidënt dl Südtirol à rujenà cun Danuta Hübner, cumisser dla UE per la regions: “La à udù ite che l ie debujën che la regions da mont lëure ora proiec spezifics aldò de segmënc defrënc che va dal turism al lëur da paur y la ndustria” à spiegà Durnwalder. L cumissèr ie ënghe de chëla che l uel vester na programazion sëura i ciamps ora che debe plu forza ala culaburazion danter mont y valeda.

L fin dla prejentazion de Durnwalder fova chël de n fé udëi ite l bujën de mëter a jì n proiet per duc i raions da mont che toca bën 21 stac dla Union europea. “I raions da mont ne ie nia me lueges tuchedes da dificulteies dates dala natura, ma i à na richëza n cont de persones y economia che muessa unì sustenida cun finanziamënc tl lëur da paur, tl trasport, per l’energia, la stieres y la inuvazion” à spiegà Drunwalder prejentan na lingia de prupostes.

L pachetl de pruvedimënc purtei dant ala Cumiscion europea à l fin de miuré l atratività y l ti ruvé permez ai raions da mont a de plu manieres: miuran la comunicazion tradiziunela y digitela, miuran i culegamënc tres l’Europa, judan pro al inovazion y la creatività tla valorisazion dl savëi, dla persones y dl spirt mprenditoriel. Durnwalder à nce nvià i aministradëures dla Comunità europea de tò n cunsciderazion la funzion strategica dl lëur da paur, i prudoc dl lat y l vin di raions da mont, canche l unirà fat la reforma dla politica de agricultura n generel. “L presidënt dla Cumiscion dla Union Europea Barroso à udù la scumenciadiva dla regions de bon uedl, ma śën muessa la bona ulentà unì cuncretiseda” à stlut ju Drunwalder.

as

Galaria dales fotografies