Atualità
Dala Junta: apalc, scemplificades la garanzia provisora y la cauziun
Scemplificaziuns dla Junta provinziala les normes sön la garanzia provisoria por la partezipaziun ales prozedöres d’apalt y la cauziun tla fasa d’esecuziun.
La lege provinziala sön i apalc é jüda ofizialmënter en forza ala fin dl ann passé. La Junta provinziala á elaboré sëgn les diretives spezifiches por ci che reverda süa aplicaziun concreta che stlarësc y scemplifichëia la normativa. “La lege nöia y les diretives d’aplicaziun nes pormët da adoré le plü che ara vá les sperses lëdies che nes vëgn conzedüdes dales diretives europeiches”, á splighé le presidënt Kompatscher. Incö ai 11 de lugio á la Junta aprové de plü prezisaziuns por ci che reverda la garanzia provisora por la partezipaziun ales prozedöres d’apalt y sön la garanzia por la fasa d’esecuziun di contrac. “Al é scemplificaziuns che reverda le sistem de gestiun dles cauziuns y che vá a bëgn di operadus economics mo che alisirëia ince le laur por les aministraziuns”, dij Kompatscher.
Tl caje dla garanzia provisora prezisëia la delibera da incö che la presentaziun dla detlaraziun d’impëgn da relascé la cauziun definitiva por l’esecuziun dl contrat d’apalt ne vëgn nia damanada al’impresa por laurs cina ai 2 miliuns de euro y por fornidöres y sorvisc cina le lim europeich de 209mile euro. Implü ne mëss nia dé jö chësta detlaraziun d’impëgn les microimpreses, les piceres impreses y chëres mesanes, i grups de impreses a tëmp o consorc costituis da microimpreses o da piceres impreses y chëres mesanes.
La cauziun sciöche garanzia tla fasa d’esecuziun, do avëi ciafé l’apalt, é normalmënter le 2% dl import contratual cun la posciblité de reduziun a 1% o de n aumënt a 4% sön la basa dla prestaziun proponüda y al livel de risch. Cun la mudaziun aprovada ne mëss la reduziun o l’aumënt dla cauziun nia plü ester motivada dala staziun d’apalt, mo ara vëgn conscidrada automatica. Al resta indere l’oblianza da motivé la cauziun tl caje che n’impresa é esonerada dala prestaziun dla garanzia pro l’esecuziun dl contrat.
N’atra scemplificaziun aprovada dala Junta: tl caje de gares a invic por apalc cina 500mile euro pó les staziuns apaltantes ne damané nia les assiguraziuns de lege (la “polizza CAR”) sce i afidatars dl apalt á na poliza de responsabilité zivila.
USP
