Atualità
Pedagoghes dl’Islanda te scolina de Urtijëi
Bele da trëi ani incà vën delegazions de furmazion cun pedagoghes de scolina dl’Islanda a vijité l Raion de Scolina "Ladinia".
Juech liede tl bosch, mandalas de materiai naturei, juech de jì a crì y de se ascuender, descuscions n con‘ dl bosch: tla Direzion de Scolina „Ladinia“ ie la pedagogia dl bosch ti ani passei stata un di ponc pedagogics fundamentei. L vënderdi dl’ena passeda à na delegazion de maestres y cunlauradëures dla Scolina Nordurbergi de Hafnarfjordur vijità la scolina Salieta a Urtijëi. L ie bele l terzo iede ndolauter che la Direzion de Scolina Ladinia à giapà na dumanda de uspitazion da pert dl mond furmatif islandesc.
La diretëura Genny Ploner ti à fat, ala maestres de scolina islandejes, na ntroduzion curta tla storia dla scolines ladines y tl cunzet pedagogich dla pedagogia dl bosch, stlarian nce la particulariteies dla scolines ladines, cun plu rujenedes. Ala delegazion islandeja ti iel unì pità l mesun de jì diretamënter tl bosch per se fé na bela esperienza de coche furmazion y raport cun la natura possa jì a una. Nce tl’Islanda iel mesun jì ora tla natura cun la sculées y i sculeies de scolina, scebën che l ie iló na natura y na cuntreda carateriseda dal vulcanism y nscila ie la esperienzes dut d’autres che no chëles te n raion da truep bosch coche a Urtijëi y te Gherdëina n generel. Na mprescion dut ntëur bona ti àl fat ala delegazion islandeja i truep locai y nce la bela lerch che l ie tla senta dla Scolina Salieta, ulache l possa unì metù n droa na uferta pedagogica desferenzieda. La delegazion dal’Islanda à cunstatà che nce sce la doi scolines dla Ladinia y dl’Islanda ie geograficamënter scialdi dalonc, iel mpo truepa cosses che se semea n con‘ dl lëur pedagogich, y che ala fin dla finedes à la mutans y i mutons sibe tlo che iló i medemi bujëns.
"Mëter adum rujenedes y natura"
"Son cuntënc de pudëi purté ite nosta esperienzes tl cheder de n barat dut ntëur de gran fazion danter reprejentantes dla istituzions furmatives ladines y islandejes," sotrissea l assessëur provinziel cumpetënt per la Scola y Cultura Ladina Daniel Alfreider: "Tla scolina ladina ne vëniel nia mé nsenià bele dal scumenciamënt incà la truepa rujenedes che on tlo da nëus, ma sambën nce la pluralità y particularità de nosc raion naturel y culturel. Ajache: rujenedes y cultura lieia. Sce la natura possa unì vivuda danman, diretamënter, iel bele mesun dé inant tla scolina mpulsc mpurtanc per l manejamënt dla natura y de n maië sann."
L cuntat y l barat danter reprejentantes de istituzions de furmazion a livel europeich ti pieta ala scolines ladines l mesun positif de paredlé y nce de mparé l’una dal’autra,“ auza ora la diretëura dl Ressort Scola y Cultura Ladina Edith Ploner: "On propi truepa legrëza cun la scumenciadiva y da dedò cun l feedback da pert dla delegazion de furmazion islandeja, che nes mutivea a lauré inant te na maniera tan prufesciunela te n ciamp tan mpurtant per nosta mutans y nosc mutons."
La prima cunlauradëura dla Direzion dla Scolina Ingrid Mussner à bele dan n valgun ani fat la furmazion da pedagoga dl bosch y tën nscila, sibe tla scolina che te istituzions dedora da chësta, regulermënter referac che à da n fé cun chësta materia de scolina. La prejënza de chësta ressurses spezifiches nternes dl Zënter dla Scolina „Ladinia“ à propi arjont si finamira che la pedagoghes islandejes ebe pudù mparé a cunëscer te na maniera pratica l’ativiteies che vën metudes a jì aldò dla pedagogia dl bosch.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/mac/dl
